Read njo YIHUSUA 24 Bible Online

YIHUSUA 24 - njo bible

YIHUSUA 24

¹Idangji Yihusuai Israel kin ajak Shekemi atenshidaktsü, aser par tamburtem, tanishirtem, obendangertem aser ketdangpurtem aja, aser parnoki Tsüngrem tsüngdangi aru.

² Yihusuai nüburtem ajak dang ashi, “Israel Tsüngrem KIBUBAi yamai ashir, ‘alemli nenok tsüraburtem Abraham aser Nahor tebu Tera tena Eufrata ayong külen oa ali, aser parnoki tangar tsüngremtem tenzük.

³ Idangji ni nenok tebu Abraham Ayong külen nungjagi anir arua Kanan lima ajak ajanga ani, aser pa metsü aika kümdaktsü. Ni pa nem Isak agütsü,

⁴ aser Isak nem Esau aser Yakob agütsü. Ni Esau nem senmangtsü asoshi Seir tenem linük agütsü, saka Yakob aser par chirtem Ijip limai alu.

⁵ Aser ni Mosa o Aron na yok, aser ni yangji inyakba ama ni Ijip wara agi merenshi; aser tesülen ni nenok anitet.

⁶ Aser ni nenok tsürabur Ijip nungi anitet, aser nenok tzüyimi aru, aser Ijip nungeri talungtsü aser kor nung mener Temerem Tzüyim tashi nenok tsürabur aria aru.

⁷Aser kodang parnoki KIBUBA dang ayimten, pai nenok o Ijip nunger na tsüngda tammang kümdaktsü aser parnok madak tzüyim bener arua parnok nembang; aser ni Ijip nung kechi inyak, aji nenok tenük agi nguogo; aser anogo aika nenok arem nung ali.

⁸ “Yordan ajanger aliba Amor nunger limai ni nenok anir aru, parnoki nenok den rara, aser ni parnok nenok ket nung agütsü, nenoki parnok linük agi, aser nenok jakdang ni parnok samatsü.

⁹ Idangji Moab chuba Zippor jabaso Balaki Israel anema apuso aser rara; pai Beor jabaso Balaam ja-a nenok dak atakatemtsü yok;

¹⁰saka ni Balaam dang manga, anungji pai meyiper nenok moatsü; yamaji ni pa ket nungi nenok anitet.

¹¹ Aser nenoki Yordan atena or Yerikoi aru, aser Yeriko nisungtem, Amor aser Periz nunger, Kanan nunger, Het nunger, Girgas nunger, Hiv nunger, aser Yebus nungertemi nenok anema rara; aser ni parnok nenok ket nung bendanga agütsü.

¹² Aser nenok lijak mesüra nenok nok mamshi-i nenok tsüngdang nungi Amor nunger chuba ana dena parnok aridoktsü ni nenok jakdangi nati yok.

¹³ Aser linük ka kechi nung nenok mebelem, koba yimtitem nenoki meyanglu aser kong nenoki tsükmenatzü aser Oliv süng metsünüi nenoki achir, ni nenok nem aji agütsü aser idakji nenok alir.

¹⁴“Anungji tang KIBUBA tsübuang, pa dang nentaka aser tamang kateta tenzükang; Ijip nung aser Ayong ajanger nenok tsüraburtemi tenzükba tsüngremtem agienang, aser KIBUBA tenzükang.

¹⁵Aser KIBUBA tenzüktsü nenoki memulungra nenoki shiba tenzüktsü tanüsa shimtetang. Ayong ajanger nenok tsüraburtemi tenzükba tsüngremtem asü, mesüra nenok tang aliba Amor nunger tsüngremtem tenzüktsü. Saka ni aser ozü kibongibo, onoki KIBUBAji tenzüktsü.”

¹⁶Idangji nüburtemi langzü, “Onoki kodanga KIBUBA senzüka toktsür tangar tsüngremtem metenzüktsü!

¹⁷Kechiaser KIBUBA ozü Tsüngremi onok tsüraburtem Ijip alar tia nungi anitet, pai temaitsü tulu inyakba onoki nguogo aser onoki ajanga süiba nisung ajak nungi onok kümzüka ayu.

¹⁸Aser KIBUBAi nisung ajak oda Amor nungertem onok jakdang nungi aridok; anungji onokia KIBUBAji tenzüktsü, kechiaser pa asenok Tsüngrem lir.”

¹⁹Saka Yihusuai nüburtem dang ashi, “Nenoki KIBUBAji metenzüktettsü, kechiaser pa temeshi Tsüngrem, aser tenükmiba Tsüngrem lir; pai nenok tai temenentem matoktsü.

²⁰Nenoki KIBUBAji senzüka toktsür aener tsüngremtem tenzükra pai nenok dang junga benshia liaka pai meyiper nenok merenshitsü aser samatsütsü.”

²¹Saka nüburtemi Yihusua dang ashi, “Masü, onoki KIBUBA tenzüktsü.”

²²Idangji Yihusuai parnok dang ashi, “Nenoki KIBUBA tenzüktsü shimtetbaji nenok sasa kuli süogo.” Aser parnoki langzü, “Hau, iba kuliji onok lir.”

²³Yihusuai ashi, “Ajangla tang nenok rongnung aliba bendanger tsüngremtemji endokang aser nenok mulung Israel Tsüngrem KIBUBA dangi meyipang.”

²⁴Aser nüburtemi Yihusua dang ashi, “Onoki KIBUBA asen Tsüngrem tenzüktsü aser pa dang angatsü.”

²⁵Anungji panüji Yihusuai Shekem nung nüburtem aser Tsüngrem na tsüngda tezüngzüktepba ka yanglua ozüng aser yimsü-ozüng ka parnok nem agütsü.

²⁶Yihusuai itemji Tsüngremer ozüng kaket nung zülu, aser pai lung tulu ka bena arua KIBUBA tekülemdak ki anasa sülemdong züngdang aji azüng.

²⁷Aser Yihusuai nisung ajak dang ashi, “Ajiang iba lung ya asenok asoshi kuli ka alitsü. KIBUBAi asenok dang ashiba o ajak iba lung yagi angashiogo; anungji nenoki Tsüngrem dang ochi meshira, iba ya nenok anema kuli ka alitsü.”

²⁸Idangji Yihusuai nüburtemji pei senmangdagi odaktsü.

²⁹Itemji süir külen, Nun jabaso KIBUBA tenzüker Yihusua arishi küm noklang ka ser ter nung asü.

³⁰ Aser parnoki pa Gaash tenem anüdoklentip Efraim tenem lima nung aliba pa senmang arrtsü Timnath Sera nung arem.

³¹Aser Yihusua mapang ajak nung aser Yihusua sülen aliba tamburtem mapang ajak nung Israeli KIBUBA tenzük; aser pai Israel asoshi inyakba mapa ajak meteta liasü.

³² Aser Israel chirtem Ijip nungi bener aruba Yosef teret Shekem tebu Hamor jabasotem nungi Yakobi sen noklang ka agi aliba ali tila ka Shekem nung arem; aser itemji Yosef semchir senmang aküm.

³³Aser Aron jabaso Eleazar asü, pa nem agütsüba Efraim tenem lima nung pa jabaso Finehas tenem nung parnoki pa arem.