Read njo YIHUSUA 4 Bible Online

YIHUSUA 4 - njo bible

YIHUSUA 4

¹Kodang kin ajongai Yordanji meshi meshia ajang, KIBUBAi Yihusua dang ashi,

²“Nüburtem rongnungi nisung terana, kidong shia nungi ka ka shimtetang,

³aser parnoki Yordan tiyong kong putirtem tetsüng akang akanga noktak, idak nungjagi lung terana agiteta taonung nenok tanendaki bener oang ta shiang.”

⁴Anungji Yihusuai Israel nüburtem nungi shimtetba kidong shia nungi nisung ka ka aja,

⁵aser parnok dang ashi, “KIBUBA nenok Tsüngrem Ozüng Süngdenji ajanga Yordan jagi iang. Nenok nisung shiai pei kin züngsem apir lung ka ka pei tapubang nung benang,

⁶ibai nenok atema temaitsü ka alitsü, aser tesülen nenok chirnuri ibai kechi tetezü? ta asüngdangra,

⁷nenoki parnok dang ashitsü, ‘Kechiaser Yordan ayongji KIBUBA Ozüng Süngden tsüngdang sadang; kodang yagi Yordan ajanga süi Yordan tzütemji sadangadok.’ Anungji item lung ya tarutsü nung Israel chirtem asoshi tatem makai nüngshi ama alitsü.”

⁸Israel chirtemi Yihusuai melaba amaji inyak; KIBUBAi Yihusua dang ashiba ama, Israel chirtem kin apir parnoki Yordan tiyong nungi lung terana agitet aser parnok den itemji tanendak bener oa ayu.

⁹Aser kong tezüngzüktepba Ozüng Süngden apur putirtem noktak, yangji Yihusuai lung teranaji azünga ayu, aser itemji tang tashi idakji lir.

¹⁰Kechiaser Mosai Yihusua dang melaba ama KIBUBAi Yihusua dang nübur dang ashitsü melaba merenem tashi Ozüng Süngden apur putirtemji Yordan tiyong nung noktaka ata; aser nüburtemi ilunga ajanga ao.

¹¹Kodang nisung ajaki ajanga ao, KIBUBA Ozüng Süngden aser putirtemji nübur madang atena aru.

¹²Aser Mosai parnok dang ashiba ama Reuben chirtem, Gad chirtem, aser Manase kidong tesadang nok o nü bener Israel chirtem jakdangji ao;

¹³raratsü renemba nübur meyi lir shi KIBUBA madangji süia tongbangi Yeriko lenteni ao.

¹⁴Panüji KIBUBAi Yihusua Israel nunger nükdang uludaktsü aser parnoki Mosa tsübuba ama pa taküm tepiyong parnoki pa tsübu.

¹⁵Idangji KIBUBAi Yihusua dang ashi,

¹⁶“Ozüng Süngden abenba putirtemji Yordan nungi adoktsü melaang.”

¹⁷Anungji Yihusuai putirtem dang ashi, “Yordan nungi adokang.”

¹⁸Aser kodang KIBUBA tezüngzüktepba Ozüng Süngden apur putirtem Yordan tiyong nungi adok, aser putirtem tetsüng ali takong nungji ayaket, Yordan tzüji parnok pei alidaki meyip, aser mezüng ama tzüküm ajakji moshia ayim.

¹⁹Aser mezüngbuba ita, anogo ternübuba nung nüburtemji Yordan nungi apusoa Yeriko anüdoklen tsütsü Gilgali arua anen.

²⁰Yordan nungi agitetba lung teranaji Yihusuai Gilgal nung azünga ayu.

²¹Aser pai Israel nüburtem dang ashi, “Tarutsü nung nenok semchisemnuri item lung tetezü kechi? ta par tsüraburtem dang asüngdangra,

²²Israel ali takong manung iba Yordan ayong ajanga aru ta parnok dang shiang.

²³KIBUBA nenok Tsüngremi Temerem Tzüyim dang inyakba ama, asenok ajanga motem tashi asenok jakdang aji kongdaktsü, yamaji KIBUBA nenok Tsüngremi nenok ajanga motem tashi Yordan tzüji nenok jakdang kongdaktsü.

²⁴Kechiaser alima nung alir nisung ajaki KIBUBA tekaji tashi tulu ta metettsüsa aser nenok KIBUBA nenok Tsüngrem dang tatem makai tsübutsüsa pai aji inyaker.”