Read njo YIHUSUA 5 Bible Online

YIHUSUA 5 - njo bible

YIHUSUA 5

¹Kodang Yordan atener anüolen aliba Amor nunger chubatem aser tzüküm nung aliba Kanan nunger chubatemi; KIBUBAi Israel nüburtem jakdang parnok ajanga motem tashi Yordan ayong kongdaktsüba indang angashi, parnok mulung yimsa, aser Israel nunger tsübuba agi parnok dak tanela meli-i aküm.

²Iba mapang nung KIBUBAi Yihusua dang ashi, “Nai kotari techira yangluang aser Israel chirtemji tanaben mejepang.”

³Aser Yihusuai kotari techira yanglu aser Israel chirtemji Gibeat-ara-lot tenem nung mejeptoktsü.

⁴Aser Yihusuai kechiba mejeptoktsü iba kuliji ya: Ijip lima nungi aruba nübur rongnung, tebur ajak, oda Ijip lima nungi adoker külen arem nung lendang raraba nisung ajak süadok.

⁵Kechiaser Ijip nungi adokba nisung ajak mejeper liasü; saka parnok adoker lisem lima nung asoba ajak memejeptoki liasü.

⁶ Kechiaser Israel nüburtem lisem lima nung küm lir, oda Ijip nungi adokba raraba nisungtem mesama tashi senzü; kechiaser parnoki KIBUBA dang tashi manga. Aser KIBUBAi parnok tsüraburtem dang ninang mojitzü aser mamatzü yima aliba lima agütsütsü ta nangzükba limaji parnok nem mungudaktsütsü ta azüngashi.

⁷Anungji parnok chirtem shirnoki parnok melen, itemji Yihusuai mejep, kechiaser parnokji lendang memejepi liasü.

⁸Kodang kin ajonga mejep parnok maneb tashi tanendak pei kidang ali.

⁹Aser KIBUBAi Yihusua dang ashi, “Tanü ni ne dak nungi Ijip lima alar tia maaksü endoktsüogo.” Anungji iba linük dangji tanü tashi Gilgal[1] ta ajar.

¹⁰ Israel nüburtemi Yeriko lenten Gilgal nung iba ita anogo terpezünübuba nikongdang süia aoba benjong amung.

¹¹Aser süia aoba benjongji munger, tasüngji iba lima adokba piyazü meinokba amtsük aser kongnüng achi.

¹² Aser parnoki iba lima nungi adokbatemji chir külen, tasüng nungjagi manaji joko mangu, anungji Israel nüburtemi Kanan lima nungi adokba chiyungtsütem paküm nungjagi achi.

¹³Kodang Yihusua Yeriko anasai aru, pai pei tenük lapok aser rokasoa reprang aser ajiang, idakji nisung ka pa teka nung nok amer pa anema noktak aser Yihusuai pa dangi oa ashi, “Na onok asoshi asü mesüra onok anemer asoshi?”

¹⁴Aser pai ashi, “Masü, saka Temeranger KIBUBAr walunir ama ni arur;” aser Yihusuai pa tejak ali nung apudaka külem, aser pa dang ashi, “Kü kiburi pa tenzüker dang kechi ashitsü aka?”

¹⁵Aser KIBUBA temeranger walunir jagi Yihusua dang ashi, “Ne tetsüng nungi ne tsüngsem semzükang, kechiaser na noktakdak aliji temeshi lir.” Aser Yihusuai yamaji inyak.