Read njo YIHUSUA 6 Bible Online

YIHUSUA 6 - njo bible

YIHUSUA 6

¹Tang Israel nüburtem tsübuba agi Yeriko yimtiji akang akanga shibanga liasü; shinga metugu mesüra shinga mait.

²Idangji KIBUBAi Yihusua dang ashi, “Ajiang, Yeriko aser idakji aliba chuba aser tasü tait aser tesashi nisungtemji ni ne ket nung agütsür.

³Na aser raraba nisung ajaki yimtiji meketa khen aotsü. Yamajisa nenoki anogo troknü inyaktsü.

⁴Aser putir teneti san tezü agi yangluba jangzü tenet, Ozüng Süngden jakdang abentsü, aser tenetnübuba nung nenoki yimtiji tenetben mekettsü aser putirtemi jangzüji aputsü.

⁵Kodang parnoki jangzüji tashi agi apudir, aser kodang nenoki jangzü olaji angashidir, idangji nisung ajaki ola tulu agi ayimtentsü; aser yimti jaraji remdaka laotsü, aser nisung shia pei jakdangi indang indanga aotsü.”

⁶Anungji Nun jabaso Yihusuai putirtemji aja aser parnok dang ashi, “Ozüng Süngdenji benang aser KIBUBA Ozüng Süngden jakdangji putir tenet nem san zü jangzü tenet bendakjang.”

⁷Idangji pai nüburtem dang ashi, “Tejakleni oang aser yimtiji meketang, aser raraba nisungtemji KIBUBA Ozüng Süngden jakdangji odakjang.”

⁸Aser kodang Yihusuai nübur dang jembi, putir tenet jagi san tezü tenetji bener KIBUBA jakdangji süi aser jangzüji apu, aser KIBUBA tezüngzüktepba Ozüng Süngden parnok den anitak.

⁹Aser nok o nü abener nisungtemji jangzü apur putir jakdangji ao, aser tesübuba telokji Ozüng Süngden sülenji anitak aser parnok aodang putirtemi jangzü apuyonga ao.

¹⁰Aser Yihusuai nübur dang ozüng agüja ashi, “Nenok dang ayimtenang ta melaba anogo matong tashi nenoki mayimtentsü, mesüra nenoki olaji tangashidaktsü, mesüra o kata nenok bang nungi tadokdaktsü.”

¹¹Aji oda KIBUBA Ozüng Süngden nem yimtiji khen meketa pai odaktsü, aser parnoki tanendak jagi ao aser yangji anenzük.

¹²Aser Yihusuai anepdang yakta sak aser putirtemi KIBUBA Ozüng Süngdenji aben.

¹³Aser sanzü jangzü tenet amba putir tenetji KIBUBA Ozüng Süngden tsüngdangji maneni ao aser jangzüji apu; aser nok o nü abenba nisungtemji parnok jakdang ao, aser tatembuba telokji KIBUBA Ozüng Süngden sülen aru. Parnok toudak nung putirtemi jangzü apuyonga ao.

¹⁴Aser tanünü parnoki yimtiji khen meket, aser tanendaki meyipa aru. Yamaji troknü tashi parnoki inyak.

¹⁵Tenetnübuba nung parnoki anepdang züngia sak aser akhi ama yimtiji meket. Panüji dang parnoki yimtiji tenetben meket.

¹⁶Kodang parnoki yimtiji tenetben meket, putirtemi jangzüji aputsü renem. Idangji Yihusuai nüburtem dang ashi, “Ayimtenang, kechiaser KIBUBAi asenok nem yimtiji agütsüogo.

¹⁷Yimti aser idakji aliba ajakji KIBUBA dang tenla ka ama raksatsütsüla, saka nüktapangtatsür Rahab aser lar kidang alibatem dang kümzüktsü, kechiaser asenoki yokba itdangitertem lai miima ayu.

¹⁸Saka teraksatsü bendanga agütsüba osettem nungi nenok sasa pila-a liang, aji oda mesüra nenoki itemji kar danga agira, nenoki Israel tanendak timtem aser teraksa bener arutsü.

¹⁹Taribi, hon, yongmenyin aser merang oset ajakji KIBUBA tsüngdang temeshi lir. Itemji KIBUBA terizüngdaki bener arutsüla.”

²⁰ Anungji putirtemi jangzüji apu aser nüburi aji angashili tashi agi ayimten, aser jaraji remdaka lao. Idangji nisung ajak pei jakdangi indang indanga yimti jagi ai aser parnoki yimtiji agi.

²¹Aser parnoki yimti nung aliba ajak oda tebur aser tetsür, tanur-tain, nashi, san aser gado item ajak nok agi samatsü.

²²Yihusuai alinük itdangsang nisung anadangji ashi, “Jabujaritsürla kidang jagi iang aser nenoki la dang azüngashiba ama tetsürji aser la akaba ajak idak nungjagi bener arung.”

²³Aser itdangiter asangurtemji ai, aser Rahab aser la tebu aser tetsü, la adianutem, aser la akaba ajak anir adok; tenati lar kinunger ajak dena anir adok, aser Israel nunger tanendak tezülenji parnok toktsü.

²⁴Aser parnoki yimti aser idakji aliba ajak mi agi rongdoktsü aser hon aser taribi aser yongmenyin aser merang agi yangluba osettem parnoki KIBUBA terizüngdak kidang ayu.

²⁵ Saka jabujaritsürla Rahab, aser tebuer kinunger aser la akaba Yihusuai taküm kümzük, aser la Israel nunger rongnung tanü tashi lir, kechiaser lai Yihusuai Yeriko ladangtsü yokba osang benertem miima ayu.

²⁶ Iba mapang nung Yihusuai parnok dang azüngashia ashi, “Shibai iba Yeriko yimti yanglushitsü merangdir, KIBUBA atakatem pa dak kaoang. Shibai yimti kimungji tenzükdir, pei jabaso tambusang samatsü, shibai süngkhümji yangludir, pei jabaso tambusang samatsü.”

²⁷Yamaji Yihusua den KIBUBA liasü, aser pa nüngsang linük ajak nung liasü.