Read njo YIHUSUA 7 Bible Online

YIHUSUA 7 - njo bible

YIHUSUA 7

¹Saka Israel chirtemi bendanga agütsüba oset tsütsülen tamangji raksa kechiyong Yihuda kin Zera chir Zabdier jabaso Karmi chir Akani bendanga agütsüba osetji aben, anungji Israel chirtem anema KIBUBA ain adok.

²Aser Yihusua Yeriko nungi Beth-aven anasa Bethel anüdoklen aliba Ai-i nisung yok, aser parnok dang ashi, “Tuang aser alinükji ladangang.” Aser nisungtemi atu aser Ai ladang.

³Aser parnoki Yihusua dangi meyipa arua pa dang ashi, “Nisung ajakbo tetudaktsüi, nisung meyi ana mesüra asem dang tudakjang, aser Aiji makang; nisung ajak oagi belemtsü tesayang, kechiyong parnok ishikadang lir.”

⁴Anungji ilenji nisung meyi asem shi atu: aser parnoki Ai nunger tsüngdang jena ao.

⁵Aser Ai nungeri yimti süngkhümbong nungi Sheberim tonga aria lua parnoki Israel nunger semer trok shi tepset, aser nüburtem tasü pelepadok aser parnok temulung yimsa.

⁶Idangji Yihusuai pei süoshi shisa aser KIBUBA Ozüng Süngden madang ali nungji pa tejak chioker, pa aser Israel nunger tamburtemi nikongdang tashi apudak, aser parnoki pei tekolak nung auyi palok.

⁷Aser Yihusuai ashi, “Aia! Oh KIBUBA Tsüngrem, onok Amor nunger ket nung bendanga agüja onok samatsü atema nai kechiba iba nübur Yordan ajanga anir aru? Onok Yordan külenji oa alitsü temulung süa ali tajungba süla!

⁸Oh KIBUBA, Israel nungeri joko pei tsükchir nungi jena arur; ni kechi shila!

⁹Kechiaser Kanan nunger aser linük nung alir ajaki ibai angashitsü aser onok meketbangtsü aser onok tenüng alima nungi leptoktsü; aser ne tamaren tenüng asoshi nai kechi inyaktsü?”

¹⁰KIBUBAi Yihusua dang ashi, “Na sakang, kechisünung yamaji ne tejak alilen mechioker alir?

¹¹Israeli tai menaogo; hau, ni parnok dang melaba kü tezüngzüktepba parnoki raksaogo; ano parnoki bendanga agütsüba oseta benogo, parnoki auyaogo, aser parnoki miimbang aser parnoki ibaji pei oset rongnung yuogo.

¹²Anungji Israel chirtemi parnok tsükchir tsüngdang menoktakteti parnoki tsükchir dang nungi ajener, kechiaser parnok dak atakatem kao. Nenoki bendanga agütsüba osetji nenok nungi mesamara joko ni nenok den atentsü makok.

¹³Shishiang, nüburji meshitetjang, aser shiang, asüng asoshi nenok sasa meshitetang, kechiaser Israel Tsüngrem, KIBUBAi yamai ashir, ‘Nenok den bendanga agütsüba oset lir, Oh Israel nunger; nenoki bendanga agütsüba osetji, nenok rongnungi magien tashi, nenoki nenok tsükchir tsüngdang menoktaktettsü.’

¹⁴Anungji anepdang nenok pei kidongtem anasa anir arutsü, aser KIBUBAi shimtetba kidongji anasa kibongtem arutsü, aser KIBUBA shimtetba kibongji nisung kaka anasa arutsü.

¹⁵Aser shibai bendanga agütsüba osetji aben pa aser pa akaba ajak mi agi rongsettsü, kechiaser pai KIBUBA tezüngzüktepba raksa aser Israel nunger dak tamashi benloktsü.”

¹⁶Anungji Yihusuai anepdang yakta sak, aser Israel nungerji kidong kidong anasai anir aru; aser Yihuda kidongji shimtet.

¹⁷Aser Yihuda kidongji pa anasa anir aru; aser Zehar kibong shim; aser Zehar kinunger nisung ka arudaktsü, aser Zabdi shimtet.

¹⁸Aser pai par kimang nisung ka ka anasa anir aru; aser Yihuda kidong Zera chir Zabdier jabaso Karmi chir Akan shimtet.

¹⁹Yihusuai Akan dang ashi, “Kü chir, Israel Tsüngrem KIBUBA madang yangi ochi shiang aser nangzükang. Nai kechi inyak tang kü dang shiang, aji kü dang nungi temiim.”

²⁰Akani Yihusua dang ashi, “Atangji Israel Tsüngrem KIBUBA anema ni temenen menaogo, aser ni yamai inyak.

²¹Kodang temakzükba oset rongnung Shinar nunger tema sepoksü ka, taribi shekel noklang ana, aser hon lung ka toudangba nung shekel tenem ni angu; idangji itemji ni azüabung, aser itemji ni agi; aser ajiang, kü süki kübok taribiji telung sür ni itemji ali nung rema lir.”

²²Anungji Yihusuai nisung kar yoka parnoki süki jagi asema oa taribiji telung sür pai süki nung miima alibaji angu.

²³Aser parnoki aji süki nungjagi agiteta Yihusua aser Israel nübur ajak dangi bener aru, aser parnoki itemji KIBUBA tsüngdang toktsü.

²⁴Aser Yihusua aser pa den aliba Israel nunger ajaki Zera jabaso Akan aser taribi aser sepoksü aser hon lung aser par jabaso, aser jalatem, par nashi aser par gado, par san, par süki aser pa akaba ajak meshir, parnoki item ajak Akhor lenteni bener aru.

²⁵Aser Yihusuai ashi, “Kechiba nai onok timtemdaktsü? Tang KIBUBAi na timtemdaktsütsü.” Aser Israel ajaki Akan lung agi onset, ano parnoki par kibong aser pa akaba ajak dak lung agi aon aser itemji mi nung arong.

²⁶Aser parnoki pa manung lungnang tulu ka anang, aji tanü tashi lir; aser KIBUBAi pa tetsübutsü ain ait nungi meyip, iba yongji tanü tashi iba linük dang Akhor[2] lenten ta ajar.