Read njo YIHUSUA 8 Bible Online

YIHUSUA 8 - njo bible

YIHUSUA 8

¹Idangji KIBUBAi Yihusua dang ashi, “Tetsübu, mesüra temulung ajema teküm, raraba nisung ajak ne den anir apusoa Ai-i tuang ni Ai chuba aser par nübur, par yimti aser par linük ne ket nung agütsüogo.

²Nai Yeriko aser iba chuba dang benshiba ama Ai aser iba chuba danga inyaktsü; saka idakji aliba oset aser kiset shiruruji nenok temakzükba oset amato abentsü. Yimti tesülen nisung kar atsüka ata-ang.”

³Anungji Yihusua aser raraba nisung ajak Ai-i aotsü apuso, aser Yihusuai nokinketer nisung meyi semer shimteta parnokji aonung yok.

⁴Aser parnok dang mela-a ashi, “Ajiang, yimtiji anema nenoki arü amentsü, yimti tesülenji; yimti nungjagi talang ka tuo, saka nenok ajak renema liang.

⁵Ni aser kü den alir ajak yimti anasai arutsü, aser kodang parnok anasai arudir, mezüng amato onoki parnok tsüngdang ajentsü.

⁶Mezüng amato item Israel nungertemji asenok jakdang jena odagi ta parnoki bilemtsü, idangji parnoki onok aria arutsü, aser onoki parnokji yimti nungjagi piladaktsütsü.

⁷Aser nenoki arü amendak nungjagi adoktsü aser yimtiji agitsü; kechiyong KIBUBA nenok Tsüngremi nenok ket nung aji bendanga agütsütsü.

⁸Aser kodang nenoki yimtiji atsüngtetdir, KIBUBAi nenok dang melaba ama nenoki yimti nungji mi asentsüla. Ajiang ni nenok dang melaogo.”

⁹Aser Yihusuai parnok yok aser parnoki arü amentsü ao aser Ai anüolen tsütsü Ai aser Bethel[3] na tsüngda nung ali, saka paonungji Yihusua nübur rongnungji anen.

¹⁰Yihusuai anepdang yakta sak aser nüburtem ayongten, aser Israel tamburtem den Ai nunger jakdangi atu.

¹¹Aser raraba nisungtem pa den alir ajak atu aser yimti anasa oa Ai anüdoklentip tsütsü anen, aser idakji parnok aser Ai Bethel na tsüngda ali lenten ka liasü.

¹²Aser pai nisung meyi pungu shi shimtet aser Ai aser Bethel na tsüngda, yimti anüolen tsütsü parnokji arü mena toktsü.

¹³Anungji raraba nisungtem telok tanendak anüdoklentip nungi anüolen tsütsü arü mena alirtem ajakji tongbang asoshi renema toktsü, aser Yihusuai paonungji lenten nungji amen.

¹⁴Kodang Ai chubai aji angu, anepdang yakta pa aser yimti nung alir ajak Araba jakdang Israel anema tongbangi ao. Saka yimti tesülen telok ka pa anema arü mena lir ta pai memetet.

¹⁵Yihusua aser Israel nunger ajaki makok amai parnok tsüngdang sayu, aser lisem lima len jagi ajen.

¹⁶Aser parnok aria aotsü yimti nung alir nisung ajak külemi ayongten, aser parnoki Yihusua aria ao aser parnok yimti nungjagi pila-a aru.

¹⁷Aser Israel nunger sülen maoba nisung kata Ai aser Bethel nung anünga mali asü, aser parnoki yimtiji menüki toktsür, Israel nungerji aria ao.

¹⁸Idangji KIBUBAi Yihusua dang ashi, “Ne ket nung aliba nüji Ai tsütsü ajungketang, kechiaser ni ibai ne ket nung agütsüogo.” Anungji Yihusuai pa ket nung aliba nüji yimti tsütsüji ajungket.

¹⁹Aser arü mena aliba telokji yakta parnok alidak nungi adok, aser pai tekaji songdokli-i parnokji asema ao, aser yimti jagi ia aji atsüngtet aser parnoki ilunga yimti nungji mi asen.

²⁰Aser kodang Ai nisungtemi tesülenji reprang, yimti nungi adokba mokozüji anüng tonga tua parnoki angu; aser parnok ileni mesüra ilenji ajentsü lenmang maliasü, kechiaser lisem limai jena aortemi meyiper parnok aria ao.

²¹Kodang atsüka aliba teloki yimtiji agiba aser yimti nungi mokozü anüng tashi tua angu, idangyongji Yihusua aser Israel ajak tanaben meyip aser Ai nisungtemji tepset.

²²Aser tangartemji yimti nung jagi parnok anema adok; parnok külen külen na Israel nunger yongtsü nung liasü, kar ileni aser kar ilenji; aser parnoki parnokji shinga metoktsüi aser mejendaktsüi tepset.

²³Saka Ai chubaji parnoki taküm apu, aser Yihusua dangi anir aru.

²⁴Kodang Israel nungeri lisem lima nung parnok aria arur Ai nunger ajak nok agi tepset, parnok Ai-i meyipa aru aser yangji alirtem nok agi samatsü.

²⁵Panüji laoba nisung Ai nunger tetsür tebur ajak agi meyi terana liasü.

²⁶Kechiaser Ai nung alir ajak mesamatsü tashi Yihusuai nü ajungketba teka memeyip.

²⁷KIBUBAi Yihusua dang melaba o ama Israel nungeri yimti nung makzükba oset aser kiset shiruru dang terakzükba oset amato parnok asoshi bener ao.

²⁸Anungji Yihusuai Ai rongtoktsü aser teti asoshi ibaji alinang ka dang kümdaktsü, tanü tashi ibaji tesama yimti ka dang lir.

²⁹Anungji pai Ai chuba nikongdang tashi süngdong ka nung meta aser anü ludaka nung Yihusuai ozüng agütsü aser parnoki süngdong nungi pa temang agizük aser aji yimti kikümbang tayidak toktsü aser tanü tashi idakji lungnang tulu ka nanga lir.

³⁰ Idangji Yihusuai Ebal tenem nung Israel nunger Tsüngrem KIBUBA atema tenladak ka yanglu;

³¹KIBUBA tenzüker Mosai Israel chirtem dang melaba ama aser Mosa ozüng kaket nung zülua aliba ama lung agi tenladak ya yanglu, koba manung nisung shingaia merang kata majungket, aser idakji parnoki KIBUBA nem tarongba tenla aser yimjung tenla agütsü.

³²Aser pai lung manungji pai züluba Mosa ozüng ajizüka, Israel nunger chirtem tsüngdang zülu.

³³ Aser Israel nunger ajak, aser par tambur aser bangdakpur aser par o bendangertem Ozüng Süngden külen tsütsü noktak, aser tip külen Levi putir jakdang, KIBUBA Ozüng Süngden abener, aser senso aser aener ajak; parnok tesadang ka Gerazim jakdang aser tesadang ka Ebal tenem jakdang noktak, kechiyong KIBUBA tenzüker Mosai melaba ama Israel nunger tamasa moatsütsüla.

³⁴Aser kenpiga lir, pai ozüng kaket ajonga nung zülua aliba ama, temoatsü aser atakatem ozüng ajak azüng.

³⁵Mosai melaba o ajak kata meindoki Yihusuai Israel telok ajak, tetsürtem, tila tanurtem, aser parnok den aenersa munga alir ajak sentepa lia azüng.