Read njo YIHUSUA 9 Bible Online

YIHUSUA 9 - njo bible

YIHUSUA 9

¹Aser kodang Yordan külen alir tenem lima aser lenten lima nung alir, aser Lebanon jakdang tzüyim tulu tzüküm nung aliba Het nunger, Amor nunger, Kanan nunger, Periz nunger, Hiv nunger, aser Yebus nunger chuba ajaki aji angashi,

²parnoki Yihusua aser Israel nunger den raratsü temulung ka sür külemi atenshi.

³Saka kodang Gibeon nung alir nisungtemi Yeriko aser Ai dak kechi inyak aji angashi,

⁴parnoki külaka inyak aser parnoki o tongdartem amai aküm, aser parnoki juli tejen aser yi meso tejen teshisa aser talentep, parnok gado rongdong nung aben.

⁵Aser tsüngsem tejen aser tartep parnok tetsüng nung semok aser süoshi tejen parnoki sobu aser parnok chiyungtsü amtsük ajakji takong aser mangrang punga kümer liasü,

⁶aser parnoki Gilgal nung tanendak Yihusua dangi ao, aser pa aser Israel nisungtem dang ashi, “Onok alima talang ka nungi aru, anungji tang nenoki onok den tezüngzüktepba ka yangluang.”

⁷ Saka Israel nisungtemi Hiv nunger dang ashi, “Ashiko nenok onok den alir nisung asütsüa memetet nung, kodaser onoki nenok den tezüngzüktepba ka yanglutsü?”

⁸Parnoki Yihusua dang ashi, “Onok ne kilirtem lir.” Aser Yihusuai parnok dang asüngdang, “Nenok shir aser nenok kong nungi aru?”

⁹Parnoki pa dang ashi, “KIBUBA ne Tsüngrem tenüng atema ne kilirtem linük talangka nungi aru; kechiyong onoki pa indang aser pai Ijip lima nung inyakba ajak,

¹⁰ aser Yordan atena or aliba Amor nunger chuba ana dang inyakba ajak, Heshbon chuba Sihon dang aser Ashtarot aliba Bashan chuba Og dang inyakba angashi.

¹¹Aser ozü tamburtem aser ozü lima nung alir ajaki onok dang ashi, Lenmang atema chiyungtsü nenok ket nung benang, aser parnok lenji oang, aser parnok dang shiang, onok nenok kilir; anungji tang nenoki onok den tezüngzüktepba ka yangluang.

¹²Nenok dangi arutsüba anogo nung iba amtsük onok chiyungtsü atema kidang nungi talem bener aru, saka tang ajiang, aji takong lir, aser mangrang pungogo;

¹³aser onoki süngtsüba yi meso tasen liasü, saka ajiang, parnok shisaogo, aser onok lenmang nung talangka senzüba yong onok süoshi aser onok tsüngsem tejen kümogo.”

¹⁴Anungji KIBUBA dang masüngdangi parnoki chiyungtsüji parnok nungi agizük.

¹⁵Aser Yihusuai parnok den yimjung yanglu, aser parnok taküm lidaktsütsü tezüngzüktepba ka yanglu; aser telok tanishirtemi parnok dang azüngashi.

¹⁶Gibeon nunger den parnok yimjung yanglur külen anogo asemnübuba nung Israel nüburtemi itemji parnok anasa aliba kiyongertem ta angashi.

¹⁷Aser Israel nüburtem apusoa anogo asemnübuba nung parnok yimtitem tonga aru. Parnok yimtitemji Gibeon, Kefira, Berot aser Kiriat-jearim.

¹⁸Saka Israel nüburtemi parnok metepset, kechiaser telok tanishirtemi Israel Tsüngrem KIBUBA agi parnok dang azüngashir liasü. Anungji telok ajaki tanishirtem anema nemnem.

¹⁹Saka tanishirtemi telok dang ashi, “Israel Tsüngrem KIBUBA agi asenoki parnok dang azüngashiogo, anungji asenoki parnok dak tamajung meinyaktsüla.

²⁰Asenoki azüngashiba ama parnok lidaktsütsüla; aji mesüra asenoki azüngashiba yong terasaba ain ait asenok dak alitsü.

²¹Aser tanishirtemi parnok dang ashi, parnok taküm lidakjang, saka telok ajak atema parnokji süngsor aser tzütar kümdakjang.” Anungji tanishirtemi jembiba amaji parnoki inyak.

²²Idangji Yihusuai Gibeon nungertemji aja aser ashi, “Nenok onok rongnung lir nung, onok nenok nungi talang nung oagi lir ta kechiba onok ashioktsür?

²³Anungji tang nenok atakatem kümogo, nenok teti asoshi alar küma kü Tsüngrem kin asoshi tzütar aser süngsor küma alitsü.”

²⁴Aser parnoki Yihusua dang ashi, “KIBUBA ne Tsüngremi pa tenzüker Mosa dang nenok nem ali ajak agütsütsü, aser iba lima nung alir ajak nenok jakdang samatsütsü ta melaba, aji ne kilirtem dang chichia ashi; aji asünung onoki pei taküm asoshi nenok kanga dang tsübua aküm, aser iba mapa ya inyak.

²⁵Aser tang ajiang, onok ne ket nung lir aser nai onok dang inyaktsü kechi shitak aser junger ta ajiteter aji inyakang.”

²⁶Aser pai parnok dang yamaji benshi, aser Israel chirtem ket nungi anitet, aser parnoki parnok metepset.

²⁷Saka Yihusuai panüji telok asoshi aser KIBUBAi shimtetdak tesem asoshi süngsor aser tzütar asütsü parnok kümdaktsü, koba tanü tashi yamaji lir.