Read njo 2 TESALONIKA 1 Bible Online

2 TESALONIKA 1 - njo bible

2 TESALONIKA 1

¹ Paul, Silvana aser Timoti, Tebu Tsüngrem aser Kibuba Yisu Khrista nung Tesalonika arogo dangi:

²Tebu Tsüngrem aser Kibuba Yisu Khrista nungi nenok dangi taochi aser tesünep sang.

³Adianutem, nenok asoshi onoki Tsüngrem nem teti tenüngsang agütsütsü tim lir, aser aji tetemsü lir, kechiyong nenok tamang kanga akanga ainer aser nenok ajak nisung shia medemeri medemer tsütsü temeim moshidagi.

⁴Anungji nenok rishikangshi aser timtem ajak, koba nenoki aremzüker, item nung nenok tamang aser taremzükba asoshi Tsüngremer arogotem nung onoki nenok asoshi tejak tenteter.

⁵Tsüngrem Yimli, koba atema nenoki timatemer, iba Yimli asoshi nenok tetemsü ta züngshitettsü asoshi, nenok timtembaji Tsüngremer ochi o bendang yimjaki adoka sayuba tatishitsü alitsü.

⁶Kechiyong Tsüngremi ochi inyaktsü; nenok rishikangshirtem madak rishikangshiba pai bener arutsütsü.

⁷Aser nenok rishikangshi angurtem onok den külemi anisüngzük angutsü. Kibuba Yisu pai tashi tait tenyartem den kotak nungi milak nung jungkai adokdang pai ya inyaktsü,

⁸aser Kibuba osangtajung dang tashi mangaba purtem aser Tsüngrem memetetba madak obendangba alitsü;

⁹ parnok temerenshiji teti tatem maka temerenshi, aser parnok Kibuba tsüngdang aser pa tashi tait sentsüwangshi nungi aridoktsü.

¹⁰Kodang pa pei temeshipur dak sentsüwangshia tushitsü Anogo arudir, idangji nenoka densema alitsü, kechiyong nenoki onok kuli nung amang.

¹¹Aser iba asoshi Tsüngremi nenok dang nenok ajaba tetemsü ta züngshitsü, aser tajung jangraba ajak aser tamang mapa ajak ain agi atalokdaktsütsü asoshi,

¹²aser asen Tsüngrem aser Kibuba Yisu tenüng dak aser nenok pa dak sentsüwangshitettsü asoshi onokia teti nenok atema sarasademer.