Read njo 2 TESALONIKA 3 Bible Online

2 TESALONIKA 3 - njo bible

2 TESALONIKA 3

¹Tatemsa, adianutem, nenok dak inyakba ama Kibuba O karaa prokshia odaktsütsü aser sentsüwangshitsüsa onok asoshi sarasademjangma;

²aser meshisadangba nisung majung nungi onok kümzüktettsü asoshi, kechiaser ajaki dakbo tamang mali.

³Saka Kibubaji temulung lemteta lir; pai nenok tashi itdaktsütsü, aser tamajungba nungi nenok sottsü,

⁴aser onoki nenok nem agütsüba ozüng nenoki inyaker, aser ano inyaktsü ta, nenok indang Kibuba nung onoki tamang akar.

⁵Aser Kibubai nenok temulung Tsüngrem temeim dangi aser Khrista taremzükba dangi aniang.

⁶Adianutem, onok nungi angazükba tesayuba otsü ama mesüi adianu shir azümesen lir, parnok nungi nenok sasa atsüngzükang ta asen Kibuba Yisu Khrista tenüng nung onoki nenok nem ozüng agütsür.

⁷Kechiyong nenoki onok tatishitsü ajizüktsü nenok sasa meteta kar; kechiaser onok nenok rongnung alidang onok azümesena maliasü.

⁸Shinga nungia onoki angati chiyungtsü memeshi, saka onoki nenok shinga nema khuret mekümdaktsüi mangli sangwali onoki meranga inyaka belem.

⁹Aji benshitsü onok temeten maliba yong masü, saka nenoki onok jilu ajizüktsü asoshi, onok sasa nenok dang tatishitsü sayu.

¹⁰Kechiyong kodang onok nenok den liasü, onoki nenok nem ozüng agütsüba ama, nisung kari mapa meinyakra, pa techiyungdaktsü:

¹¹Kechiyong nenok rongnung nisung karbo azümesena kecha meinyaki kazüa dang aliba indang onoki angashir.

¹²Tang tesüngjem nung parnok mapa inyakang, aser parnoki pei chiyungtsü chiyungang ta, ibala purtem dang Khrista nung onoki ozüng agütsür aser ajungshir.

¹³Saka adianutem, mapa tajung inyakba nung nenoki lakteta teküm-ma.

¹⁴Aser nisung kari iba shiti nung melaba ama meinyakra iba nisungji ajioka yuang, aser pa akdaktsütsü asoshi nenoki pa den temedem.

¹⁵Aji saka pa tsükchir ama tezüngshi, saka adianu ama ajungshiang.

¹⁶Tang tesüneptsüba Kibubai pei sasa mapa ajak nung ajaklen nenok nem tesünep agüjang. Kibuba nenok ajak den liang.

¹⁷‘Paul nungi salem’ ta ni pei ket agi zülur; ibaji kü shiti ajak nung temaitsü lir; aser tanga ni yamaji zülur.

¹⁸Asen Kibuba Yisu Khrista taochi nenok ajak den liang.