Read njo 1 TIMOTI 2 Bible Online

1 TIMOTI 2 - njo bible

1 TIMOTI 2

¹Anungji ajak dang tamasa nisung ajak asoshi temepishiba, sarasademtsüba, tangar atema asüngdangtsüba, aser tenüngsang Tsüngrem dangi abentsüla.

²Lenmang ajak nung akhümtsübu aser Tsüngrem tesüngjem nung asenok alitsü asoshi chubatem aser shir yimsüsüba menden nung lir, parnok asoshi sarasademjang.

³Ibai asen Kümtetdakba Tsüngrem madang tajung aser tagizüktettsüsa lir.

⁴Pai nisung ajak kümzükdaktsünür aser ochi metetba shisatsü dangi arudaktsünür.

⁵Kechiyong Tsüngrem o nisung-na tetsüngdai aisang oda Khrista Yisu lir.

⁶Pai ajak asoshi tekümtet talang agütsü. Iba kuliji oda mapang shitak nung Tsüngremi nisung ajak kümzüktettsübaji lir;

⁷aser iba asoshi Bendangertem dangi ni tenyar ka aser tesayur ka ama ochi aser tamang osangtajung sayutsüngitsü shimtet. Ni atangji jembir, ni meyazür.

⁸Anungji ain adokba aser bangsentepba medeni teburtemi tesem ajak nung temeshi teka mekanga sarasademdaktsünür.

⁹ Ano yamajisa tetsürtemia tetsür tim yimya aser tesüngjem agi ajemalu sobutsü pei sasa sobuang. Temechiba ku, hon mesüra senti lung aser senti sobutsü agi masü,

¹⁰saka mapa tajung ajanga Tsüngrem tsübuba nangzükba ama temsüa liang.

¹¹Tetsüri bendanga agüja ajemalua angazükang.

¹²Saka tesayutsü mesüra tebur madak bangdak benshitsü, ni tetsür dang memelar, saka la ajemajema liang.

¹³ Kechiyong tamasa Adam aji sür-ang Eva yanglu;

¹⁴ aser Adam mekülakokdaktsü, saka tetsürla külakokdaktsü nung la tai nung tsük.

¹⁵Saka parnok ajemalu agi tamang aser temeim aser temeshitetba nung maneni lira, la techir agi kümzüktsü.[1]