Read njo 1 TIMOTI 3 Bible Online

1 TIMOTI 3 - njo bible

1 TIMOTI 3

¹Shibai arogo tanüker mapa bushir, pai atangji mapa tajung asoshi jangrar. Ya ochi o lir.

² Anungji arogo tanükerji tai maka, tetsür ka kinungpu küma, teyari benshiba, tebilemdangba, tatong ashiba, aener mesüba, tesayutsü tesangra asütsüla;

³Paji yi ajemer mesüra samaru nisung masü, tesashi aser sen penbuba nisung masü, saka ajemalu aser anükalem alitsüla.

⁴Pei kibong jungjunga yimsü sütetba, aser lenmang ajak nung pei chirtem retreta azüoka yutetba nisung asütsüla.

⁵Kechiaser nisung kati pei kibong yimsüsütsü memetetra, pai koda Tsüngrem arogo acha-ayangtsü?

⁶Asüküm mokozü agi kua, mojing taitsüba nung metsüktsü asoshi paji nütsüng tasen ka masütsüla.

⁷Idakji chia pa tatalaba mangutsü aser mojing sang nung metsüktsü asoshi, tezü nung alirtem nungi pa kuli tajung anguba asütsüla.

⁸Yamajisa dikontem teshisadangba alitsü, temeli ana masü, yi ajemba masü, merumeru masü,

⁹aser mulungsentsü temerük den tamang miim o ametba nisung asütsüla.

¹⁰Aser tamasa parnok ano atitangang, idangji parnok ano tai maka süra, parnok dikon mapa inyakdakjang.

¹¹Yamajisa parnok kinungtsürtema teshisadangba alitsüla; tebang telili masü, teyari benshiba aser ajak nung temulung lemtetba alitsüla.

¹²Dikon kaji tetsür ka dang agiba aser pei chirtem aser kibong, jungjunga yimsü sütetba asütsüla.

¹³Kechiyong shirnoki dikon ama mapa jungjunga inyakogo, parnok pei sasa mapa tajung aser Khrista Yisu dak aliba tamang nung kanga temulung lemtetba ajangzüker.

¹⁴Ni ne dangi yakta arutsü imladagi, saka ni menua lira, ochi tongshi aser tazüngdak,

¹⁵koba Tsüngrem ki, oda taküm Tsüngremer arogo nung nisungi koda benshitsü tim, aji nai metettsü asoshi, ni item o zülur.

¹⁶Aseni nangzükba tamang miim oji koda tulu: “Pa shi nung jungkai adok, Tanela nung temeten angu, kotak tenyartem agi angu, Bendangertem rongnung sayutsüngi, alima nung amangogo, sentsüwangshi nung aniketa atu.”