Read njo 1 TIMOTI 4 Bible Online

1 TIMOTI 4 - njo bible

1 TIMOTI 4

¹Saka Tanelai chichia ashir, tatem anogo nung shirnok mulungsentsü merang tatsük agi aletba ama lir, aser tiyazü jembir,

²parnok kobi meli-i anemsü agi kari mashileni aniba tanelatem aser temenen tanelatem sayuba nung temulung atentsü, aser tamang nungi tsüktsü.

³Parnoki ki ayimtsü noktanger, aser tamanger aser ochi metetertemi tenüngsang agütsür achitsü asoshi Tsüngremi kechi chiyungtsü yanglu, item nungi pila-a alitsü ozüng agütsür.

⁴Kechiaser nisungi tenüngsang agi agizükra,Tsüngremi yangluba oset ajak tajung lir aser magizüktsü kecha mali.

⁵Kechiyong aji Tsüngrem o aser sarasadem agi meshiteta lir.

⁶Nai item o adianutem temulung nung yutsüra, nai koda tamang aser tajung sayuba anga-a benshir, tamang otem agi mesüa, na Khrista Yisu tenzüker tajung asütsü.

⁷Saka memeshiba aser samesa tarnunger otsü, koba kecha nüngdak maka, item nungi pila-a liang; aser ne sasa temeshiba nung sayutetang.

⁸Kechiaser temang inyaksangshi tajangzük kar lir, saka Tsüngrem tsübuba nungbo kechisarena nung tajangzük lir, kechiyong yagi tang aser tarutsü taküm tenangzükba agütsür.

⁹Iba o tamangtsü aser ajaki agizüktsü tetemsü.

¹⁰Kechiyong iba atema onoki mapa inyaker aser meranger, kechiaser onoki taküm Tsüngrem, shiba nisung ajak aser tongtibangsa tamangertem Kümtetdakba lir, pa dak imlar.

¹¹Nai item mela-ang aser sayuang.

¹²Ne asangwa shinga nema mezüngmeshi tesüdaktsü, saka o aser jakla-liro nung, temeim nung, tamang nung, temerükba nung tamangertem madang na tatishitsü ka liang.

¹³Ni maru tashi lokti dang Lai azüngba, sayutsüngiba, aser tesayuba nung temulung agüjang.

¹⁴Tamburtemi teka nemeta, shin o ajanga ne nem agütsüba koba Tanela sempet lir, aji sentoka teyutsü.

¹⁵Aser ajak madang na arenba jungkai adoktsü asoshi, item nung temulung tenang, aser merangang.

¹⁶Nai pei indang aser nai sayuba indang temulung tenang. Item nung maneni liang, kechiyong item inyak nung nai pei sasa aser ne o angashirtem anaprongla kümzüktsü.