Read njo 1 TIMOTI 6 Bible Online

1 TIMOTI 6 - njo bible

1 TIMOTI 6

¹Tsüngrem tenüng aser tesayuba matalatsü asoshi kwika süngra kübok kilirtem küma lir, parnoki pei kiburtem dang akhümtsübutsü tim ta züngshiang.

²Aser kilirtem shirnok kiburtema amangbatem lir, parnokji adianutem ta akhüm metsübui teli; parnoki tajungba-ang tenzüktet kechiaser parnok mapa nungi ajangzükbatemji parnoki meimba amangbatem lir. Item o sayuang aser ajungshiang.

³Nisung kari tesayuba balaka agi sayura, aser asen Kibuba Yisu Khrista o nung, aser temeshiba amato sayuba o nung haura makara,

⁴pa angaka ogo. Pai kecha memetet, saka tetoktep o aser bangsentep o mokokaji, raratep, tatala,

⁵tamajung, temulung malem, aser temulung memerük akümba, aser ochia maka, nisungtem nungi rarabangsen adoker. Parnoki Tsüngrem tsübubaji tajangzük angulen ta bilemer.

⁶Saka temulung achiba den temeshibaji atangji tajangzük tulu lir.

⁷Kechiyong asenoki iba limai kecha bener maru, aser yang nungi kecha bener motet.

⁸Saka chiyungtsü aser tabentsü süoshi lira, asenoki aji agi temulung chia lidi.

⁹Saka shirnoki takar kümnür, parnok tatitang nung aser sang nung aser tamashi takoksa azüabungba nung tsüker, ibala nisungtem teraksa aser tesama nung araksetdaktsür.

¹⁰Kechiyong sen meimbaji tamajung tapu ajak tera lir; aser aji bushi nung nisung kar tamang nung mashileni anir oa, tejashi jenti agi pei temulungjang ateta tsüngogo.

¹¹Saka na, Oh Tsüngrem nisung, nai item nungi jenang; saka temeshiba, Tsüngrem tsübuba, temeim, aser ajemalu item arishiang.

¹²Tamang tongbang tajung rara-ang, teti tatem makaba taküm, koba asoshi na aja, aser kuli jenti madang kuli o tajung nangzükba item taküm ametang.

¹³ Ajak nem taküm agütsüba Tsüngrem jakdang aser Pontia Pilat madang kuli o tajung nangzükba Khrista Yisu jakdang,

¹⁴nai asen Kibuba Yisu Khrista maru tashi, ozüng tarak meketi aser matalai ayutsü ni ne dang melar.

¹⁵Pa arubaji pei mapang nung Tsüngrem shiba temoatsüba aser Kibuba ka dang, chubatem madak Chuba, kiburtem madak Kibuba, tamasüba ka dang,

¹⁶anasai moutetba tesangwa nung aliba shingaia kodanga mangu, mesüra angutsü makoker; pa dang tetushi aser teti tatem makaba ain sang. Amen.

¹⁷Shirnok akümli nung takar, parnok temulung moulutsü, mesüra shitak memetetba rongsen nung parnok teimla mayutsü, saka, Tsüngrem shibai kechisarena asenok nem peria agitsü ajak agütsür, pa dak imlatsü mela-ang.

¹⁸Parnoki tajung inyaktsü, mapa tajung nung takar asütsü renema alitsü aser jungteptsü mulunga alitsü.

¹⁹Züngpong taküm amettsü, tarutsü mapang asoshi pei atema tazüngdak tajung rizüngdakjang. Item ajak parnok nem ozüng agüjang.

²⁰Oh Timoti, tebang liliba nungi, aser tiyazü agi ajaba shisatsü anema tenokdangba nungi meyipa oa, ne nem kechi benloka yutsü aji nükang.

²¹Aser kari iba tiyazü shisatsü nangzüka tamang nungi mashileni ogo. Nenok den taochi liang.