Read njo 2 TIMOTI 1 Bible Online

2 TIMOTI 1 - njo bible

2 TIMOTI 1

¹Paul, Khrista Yisu nung aliba taküm tenangzükba amato Tsüngremi mulungba ajanga Khrista Yisu Tenyar, kü temeimba chir, Timoti dangi:

²Tebu Tsüngrem aser asen Kibuba Yisu Khrista nungi taochi, yimlibilem aser tesünep sang.

³Kü sarasadem nung teti maneni na bilemtet dang, kü tetsü-teboutem ama, mulungsentsü temerük agi koba Tsüngrem dang ni tenzüker, pa tenüng asanger; ni ya mangli sangwali inyaker.

⁴Aser kodang ni na nüktzü ayimba bilemteter, kü tepela peridaktsütsü asoshi ni ne den ajuruteptsü yongyar.

⁵ Koba tamang tamasa netsü tetsü Loi aser netsü Eunis temulung nung liasü, aser ne temulung nunga lir ta ni jungjunga amanger, ne dak aliba tamayazü tamang kü nem bilemtetdaktsüogo.

⁶Aji asünung ne teka nemetba ajanga Tsüngrem sempet koba ne dak lir, aji jangrudaktsütsü ni ne nem bilemtetdaktsür.

⁷Kechiyong Tsüngremi asenok nem tetsübu tanela masü, saka ain aser temeim aser tazüokba tanela agütsü.

⁸Anungji asen Kibuba kuli asütsü, aser oda pa nüng atema ni tepoukdak alisang asoshi nai kodanga aaka telima, saka Tsüngrem ain nung osangtajung asoshi timtemba nung lemsatepang.

⁹Pai asenok kümzük aser temeshiba taküm daki pai asenok aja. Asen mapa agi masü, saka pai mulungba aser taochi agi lir. Alima mapangtem metenzük dang Khrista Yisu nung asenok nem taochi agütsü.

¹⁰Saka tang asen Kümtetdakba Khrista Yisu jungkai adokba ajanga tesangwadaki adokdaktsüogo. Osangtajung ajanga tasübaji pai tatem kümdaktsü aser taküm o tasüba na sangwadaki bener aru.

¹¹ Aser iba osangtajung atema ni sayutsüngir, tenyar aser tesayur asütsü shimtet.

¹²Ano ya asoshi ni timatemer. Aji saka ni maker, kechiyong ni shiba dak amangogo ni pa metet, aser ni pa ket nung iba anogoji asoshi kechisa nungloka yutsü, aji pai nüka alitsü akok, aji ni jungjunga amanger.

¹³Khrista Yisu dak aliba tamang aser temeim nung nai kechi atangji tesayuba ni nungi angazük, iba tatishitsü akang akanga ameta yuang.

¹⁴O tajung koba ne nem nungloka yutsü, aji nai asenok dak amungba Tanela Temeshi ajanga nüka liang.

¹⁵Fugilo, Hermogina aser Asia nung alir ajak ni nungi pila-a ogo ta nai metet.

¹⁶Onisifora kibong dang Kibubai yimlibilem sayuang. Kechiaser pai ni aiben dang kü timtem nung anisüngzüdaktsü, aser ni tepuokdak aliyonga pai kodanga mak.

¹⁷Kodang pa Romi aru, pai ni mangu tashi bushia liasü.

¹⁸Kibubai iba Anogo nungji pa nem Kibubar yimlibilem agüjangma. Aser pai ni atema Efesa nung kechi tashi inyak, nai ajak meteta lir.