Read njo 2 TIMOTI 2 Bible Online

2 TIMOTI 2 - njo bible

2 TIMOTI 2

¹Anungji kü chir, Khrista Yisu dak aliba taochi nung na tashi itang.

²Kuli aika tsüngdang nai ni nungi kechi tesayuba angazük, ano nai temulung lemtetba nisungtem nema iba tesayubaji yamala tangar sayutsü akokba nisungtem nema nunglokjang.

³Khrista Yisu temeranger tajung ka ama, nai kü den timtem aremang.

⁴Temeranger mapa nung alidang shibai temeranger ka asütsü tenüng zülu, pa temulung chidaktsütsü asoshi joko temeranger shingaia iba akümli taküm mapa nung mepudaktsür.

⁵Ano asayar kati ozüngtem amato metoktepra, pa nem sempet magütsür.

⁶Aluyimer shibai meranga inyaker, pai aluruba shilem mezüngbubaji angutsüla.

⁷Ni kechi ashir aji shisadangang, kechiyong Kibubai kechisarena nung ne nem tangatettsü shisatsü agütsütsü.

⁸Yisu Khrista, pa tasü nungi shia aruba aser pa Dawid nungi jakzükba bilemtetang; ya ni sayutsüngiba osangtajungji lir.

⁹Iba osangtajung asoshi ni tamajung inyaker ka ama talenba nung timatemer; saka Tsüngrem oji alena mali.

¹⁰Anungji teshimtetba purtemi Khrista Yisu dak aliba tekümtet aser teti tatem maka sentsüwangshi angutsü asoshi ni parnok atema ajak aremer.

¹¹Ibai tamangtsü shin o lir: “Kechiyong asenok pa den süra, asenok pa den ano taküm alitsü;

¹² Asenoki aremzükra, asenokia pa den yimsü asütsü; asenoki pa menangzükra, paia asenok menangzüktsü;

¹³Asenoki tamang makatetaka, paibo tamang kateta alir. Kechiyong pai pei sasa menangzüki melitet.”

¹⁴Itemji nai parnok nem bilemtetdakjang aser otem indang mebangsenteptsü asoshi Kibuba tsüngdang parnok dang ozüng mela-ang. Aji agi tajung kecha meinyaker, saka tangashirtemji dang raksatsür.

¹⁵A-aka meli-i teinyaker ka küma ochi oji timi amshia Tsüngrem tsüngdang agizüktettsüsa ne sasa bendanga agüjang.

¹⁶Saka memeshi jembia tebang liliba nungi pila-ang; kechiyong Tsüngrem akhüm metsübuba nung parnok tali tali adoktsü;

¹⁷Aser parnok oi chitemra agi ama achitsü. Parnok rongnung Humenia aser Fileta;

¹⁸Shirnok ochiba nungi pilaa ogo, parnoki shia arubaji atalokadokogo ta ashir, item nisungi kar tamang raksatsür.

¹⁹ Aji saka Tsüngrem takang tazüngdakji iba tajenba keter noktaka lir, aser iba manung ya ajena lir: “Kibubai pei pur meteter aser shibai Kibuba tenüng tushidir pa memeshiba nungi piladakjang.”

²⁰Saka ki tulu ka nung hon aser taribi potem dang alir masü, saka süng aser ali agi yangluba potema lir; aser item kar tetushitsü aser kar metushitsü asoshi lir.

²¹Anungji kari pei sasa item nungi merüka yura, pa teshimtet tetushitsü oset lir, Kibubai amshitsü tetemsü aser mapa tajung ajak asoshi terenem lir.

²²Saka asangwa shi azü azüabungba nungi nai pila-a liang, aser temulung temerük agi Kibuba dang ajaba purtem den ochishiba, tamang, temeim aser tesünep bushiang.

²³Saka tamaji aser tamashi o toktepba agi rarabangsen dang adokdaktsür ta meteta itemji tokjang.

²⁴Saka Kibuba tenzüker jagi merarateptsüla, saka ajak tsüngdang ajemalu, tesayutsü tesangra, aser tazüzükba nisung asütsüla.

²⁵Aser pei anema noktakbatem dang ajemalu agi metongshijang; ashiko ochi metetba dangi temulung meyipbaji Tsüngremi parnok nem agütsütsü,

²⁶aser mojingi mulungba inyaktsü asoshi parnok pa sang agi pur külen parnok sang nungi jentettsü agütsütsü.