Read njo 2 TIMOTI 3 Bible Online

2 TIMOTI 3 - njo bible

2 TIMOTI 3

¹Saka tatem anogo nung tetsübutsü mapang arutsü ta metetang.

²Kechiyong nisungi pei dang meimba, sen meimba, asükümba, mezümekümba, tatalaba, tsürabur dang tashi mangaba,

³tenüng masangba, memeshiba, yimya temeimtep mali, matsüshiba, mezüngmeshi, pei sasa mazüokba, tesashi,

⁴tajung memeimba, ashioktsüba, pei benshinütsü benshiba, angaka aoba, Tsüngrem meimba dang nungi pei pela-ang meimba;

⁵Temeshiba mesüka benshir, saka iba tashi-ain menangzüker; item nungia tejak meyipang.

⁶Kechiyong parnoki nüburtem kar kidangi yakta tua, tashi mait tetsürtem, shirnok temenen den azüabunga tapu tapu agi anishiba,

⁷teti angazüker ama, saka ochi metetba dangi kodanga marutetba, tashi mait tetsürtem apur.

⁸ Yani aser Yambri-i kechi koda Mosa noktang, aji oda item nisungtem temulung nung tamajung aser tamang indang metemsüba purtemia ochiji noktanger.

⁹Saka parnok apiga maotsü, kechiyong iba nisung ana amaji nisung ajak madang parnok tamaji-ji jungkai adoktsü.

¹⁰Saka tang kü tesayuba, kü jaklaliro, kü nükjidong, kü tamang, kü taremzük, kü temeim, kü talangka aremzükba,

¹¹ kü rishikangshibatem, timtem, Antiok, Ikonia aser Lustra nung kü dak kechi atalok, aser kechi rishikangshi ni arem, item ajak nungi Kibubai ni kümzük; item ajak indang nai metet.

¹²Atangji shiri Khrista Yisu nung temeshiba taküm ka linü, parnok ajakji rishikangshitsü.

¹³Saka nisung tamajung aser temeyipoktsürtemi külakokja aser pei külakokja tali tali tamajungba akümtsü.

¹⁴Saka na asoshibo nai kechi angazük aser kechi nung kuli shitak angu idakji liang. Kechiyong shirnok dang nungi itemi angazük, aji nai meteta lir.

¹⁵Aser koba Temeshi Lai agi Khrista Yisu dak amangba ajanga tekümtet atema na tashitemetet kümdaktsütsü akoker, aji nai lanuwa nungi meteta lir.

¹⁶Lai shiaji Tsüngremi apuoktsüba aser tesayutsü, tarütsütsü, metongshitsütsü, temeshiba nung aliba sayutsü asoshi tajung lir.

¹⁷Tsüngrem meyong nisung tabensa, aser mapa tajung ajak jungjunga abensatsü asoshi lir.