Read njo TITA 1 Bible Online

TITA 1 - njo bible

TITA 1

¹Tsüngremi shimtetbapur tamang amato, aser Tsüngrem akhümtsübuba agi ochi metetba amato,

²tiyazü mejembitetba Tsüngremi tetenzük tatem makaba mapang dang tamasa koba teti tatem maka taküm nangzük,

³saka pa o pei mapang nung jungkai adokdaktsü, iba teti tatem maka taküm teimla nung, asen Kümtetdakba Tsüngremi melaba ozüng amato, kü daka nungloka yutsüba osang atema Tsüngrem tenzüker aser Yisu Khrista tenyar, Paul, külem tamang agi kü chichiba techir Tita dangi:

⁴Tebu Tsüngrem aser asen Kümtetdakba Khrista Yisu nungi taochi aser tesünep sang.

⁵Ni ne dang melaba ama madoksaba mapatem adoksadaktsütsü, aser yimti shia nung tamburtem shimtettsü, aji asoshi Kreta nung ni na toktsü.

⁶ Nisung kar tai melira, aser pa tetsür ka kinungpu süra, aser pa chirtem tamanger aser rongrongdaktsüba tai nung tai manguba mesüra mazüokba mesüi lira, ibalaji shimtetang.

⁷Kechiyong tenzüker kaji Tsüngrem ketdangsür ama tai makai alitsüla. Pei mulungba agi benshiba masü, yakta ain adokba masü, yi pur masü, tesashi masü, tajangzük asoshi chidiyungdi masü,

⁸Saka tagütsünü, tajung meimba, teshisadangba, ochishir, temeshi aser pei sasa azüokba,

⁹atangji sayuba nung ajungshitettsü, aser menangzükertem aitsütsü asoshi tesayuba ama temulung lemtetba o amettsüla.

¹⁰Kechiyong amajok o jembiba aser külakoktsürtem aser tashi manga aika lir, tongtibangsa temejeptokertem ibala lir.

¹¹Parnok tebang anendaktsütsüla. Parnok tamajung tajangzük asoshi parnok dang sayutsü tim masüba sayua kibong ajonga telungi ludaktsür.

¹²Parnok rongnung ka, oda parnok pei ainkar kati ashi, “Kreta nunger teti tiyazür shiruru tamajung, azümesen chidiyungdi.”

¹³Iba kuli atangji, anungji parnok tamang reta akümtsü asoshi,

¹⁴aser Yihuda nunger otsülen, aser ochi nungi meyipa aoba nisungtem ozünglen temulung magütsütsü asoshi, nai parnok dang sashisashia arüjang.

¹⁵Temerükertem asoshi kechisarena temerük lir. Saka memerükertem aser mamangertem asoshi kecha temerük maka. Saka parnok temulung aser mulungsentsü anaprongla memerük.

¹⁶Parnoki Tsüngrem meteter ta parnoki nangzüker, saka parnok mapa agi parnoki pa menangzüker aser parnok tesempatsü tashi manga, aser mapa tajung ajak asoshi metemsü.