Read njo TITA 3 Bible Online

TITA 3 - njo bible

TITA 3

¹Yimsüsürtem aser bangdak kübok alitsü, tashi angatsü, mapa tajung ajak asoshi renema alitsü,

²aser nisung shinga indang majung mejembitsü, rarabangsen masütsü, saka anükalem asütsü, nisung ajak tsütsü ajemalu sayutsü, nai parnok dang bilemtetdakjang.

³Kechiyong asenoka khen mapang tamashi, tashi manga, mashileni anir oa, tekülaker küma, tapu tapu azüabunga, aser shi tepela tenzüker küma, takuba aser mokokaji nung lia, tesempar aser medemer o medemer na sempatepba lar liasü.

⁴Saka kodang asen Kümtetdakba Tsüngrem yimlibilem aser meimchir dang pa temeim jungkai adok,

⁵idangji asenok sasa inyakba temeshi mapa agi masü, saka pa pei yimlibilem amato tanaben asoba agi shidokja Tanela Temeshi-i tasen kümtsüba agi pai asenok kümzük;

⁶aser Yisu Khrista taochi agi asenok metendakja, teti tatem maka taküm teimla amato senmangertem kümtettsü asoshi,

⁷asen Kümtetdakba Yisu Khrista ajanga asenok madak Tsüngremi Tanela Temeshi moshia meküploktsüogo.

⁸Iba o tamangtsü aser Tsüngrem dak amangertemi mapa tajung nung sotaka kümdanga alitsü asoshi, ni item indang nai ajang ajanga shidaktsünür. Item o nisung asoshi tajung aser tajangzük lir.

⁹Saka tamashi tasüngdangtepba kidong otsü, bangsentepba aser ozüng indang raratepa, item ajak nungi na pila-ang; kechiaser itemi tajangzük maka aser amajok.

¹⁰Telemsateper nisung khen anaben arütsür külenbo tagizük,

¹¹kechiaser yamala nisung mashileni aor, aser pei kuli agi tai küma temenen menar, aji nai metet.

¹²Kodang ni ne dangi Artema mesüra Tukika yokdir, nai kü dangi Nikopoli-i arutsü merangang. Kechiyong idakji tsüngkhüm renteta alitsü ni mulungtetogo.

¹³Ozüng metetba Zena aser Apolo lenmang nung kecha agia manüngtsüsa renemer yokangma.

¹⁴Aser rongdak nüngdakbapur yaritettsüsa aser tejang metangi malitsü asoshi asen nüburi parnok sasa mapa tajung nung amdaktsü angazükdakjang.

¹⁵Kü den alir ajaki ne nem salem agütsür. Tamang nung asenok dang meimertem dang salem agüjang. Nenok ajak den taochi liang.