Read njo IBRI 10 Bible Online

IBRI 10 - njo bible

IBRI 10

¹Kechiyong ozüngji tarutsü aliba shitakba osettem akhüm dang asünung aji tabensaba aser temulung lemtetba shitaktiba osettemji masü nung, kechi tenlatem küm shia kasasa teti tenlar, item jagi Tsüngrem anasa aortemji kodanga tabensa mekümdaktsütet.

²Aji oda masü asübo, item tenlatemji metenlatsüsa anenadoker melila. Kechiaser tekülemertem dak nungi chichia parnok temenentemji merüktettsür ali asübo, parnok dak temenen meteta arubaji joko melila aser tenlatem ajak anenadokla.

³Saka item tenlatem agi küm shia temenentemji bilemtetdaktsür.

⁴Kechiyong nashi pungchi aser nabong zü agi temenentem agientsüji tamakoktsü.

⁵ Aji asünung kodang Khrista alimai aru, pai ashi, “Tarongba tenlatem aser oset tenlatem nai maginür, Saka ni asoshi temang ka nai renemogo.

⁶Temang rangben tarongba tenlatem, aser temenen asoshi tenlatem nung nai mepelar.

⁷Idangji ni ashi, ajiang oh Tsüngrem! Lai ozüng nung kü indang zülua aliba ama, Nai mulungba inyaktsü asoshi Ni yangi lir.”

⁸Tamasa pai shiogo, “Taküm ronga tenlabatem mesüra oset tenlabatem aser tarongba tenlatem aser temenen tenlatem nai maginür, mesüra item nungji nai mepelar. Kechiyong itemji ozüngi melaba amato tenlar.”

⁹Idangji pai ashi, “Ajiang Oh Tsüngrem, nai mulungba inyaktsü ni yangi arua lir.” Tanabubaji yanglutsü asoshi pai mezüngbuba agiener.

¹⁰Aser iba temulungtetba jagi Yisu Khrista temang teti asoshi khen dang tenlaba ajanga asenokji meshitettsüogo.

¹¹ Aser koba tenlatem agi kodanga temenentem agientsü makoker, item kasa tenlatem anogo shia putiri pei tenzükba mapa nung noktaka tenlar.

¹² Saka temenentem asoshi Khristai teti asoshi khen dang tenla ka tenlar külen pai Tsüngrem tajichilen amen.

¹³Ajisür külen pa tsükchirtem pa tetsüng kübok mayu tashi pai ata-a lir.

¹⁴Kechiyong tenlaba ka agi pai temeshitetbatem teti tatem makai abensadaktsüogo.

¹⁵Aser Tanela Temeshi-ia asenok nem kuli agütsür; Kechiyong pai ashir,

¹⁶“Kibubai ashir, item anogo süir külen, parnok den ni iba tezüngzüktepba yanglutsü, parnok temulungjang nung kü ozüngtem ni ayutsü, aser itemi parnok temulung nung ni zülutsü.”

¹⁷ Ano pai ashi, “Aser parnok temenentem aser parnok taitem ni joko mebilemtettsü.”

¹⁸Tang kong item temenen tatokbatem lir, temenen asoshi joko tenlaba malitsü.

¹⁹Anungji adianutem, teyindangba sü oda pa shi ajanga kechi tasen aser taküm lenmang asenok asoshi pai yanglu, asenoki iba lenmangi,

²⁰Yisu zü agi temeshidaki atutsü tasü ait nung,

²¹aser Tsüngrem ki madak putir tuluji alinung,

²² tamajung mulungsentsü nungi asen temulungjang merüktet nung, asenoki ochi temulungjang agi tamang tabensaba nung anasai odi.

²³Aser asen temang tzü temerük agi shidok nung, asen teimla nangzükba marakzüdaktsüi akang akanga asenoki ametdi, kechiyong shibai nangzükogo pa tsüngchir lir.

²⁴Aser temeim aser mapa tajung dangi jangratsü asoshi, asenoki kati ka den shisadangtepdi.

²⁵Aser kar yimsü ama asenok külemi senteptsü metoktsüi anogo kodaka anasa aiter, patakaji tali kati ka ajungshitepdi.

²⁶Kechiyong ochiba metetba shisatsü agizüker külen asenoki asa-a dang temenen benshira, ajangla temenentem atema tenla joko anünga mali.

²⁷ Saka tetsübutsü obendangba ajurutsü teimla Tsüngrem anemertem chimatsü mi tesashi dang anünga kar.

²⁸ Nisung shibai Mosa ozüng raksar, nisung ana asem kuli o agi pa aria mebilemi südaktsür.

²⁹ Ajangla nisung shibai pei tetsüng kübok Tsüngrem Chir atala-a ajemshir aser tezüngzüktepba zü, koba agi paji meshitetja liasü, iba züji menena kümdaktsür, aser taochi tanelaji sensaja atalar, pa jagi temerenshibaji koda sashia angutsü langa lir ta nenoki bilemer?

³⁰ Ya shibai ashi, asenoki meteta lir, “Mangyangba kü meyong Ni shia agütsütsü.” Aser ano, “Kibubai pei nübur o bendangtsü.”

³¹Taküm aliba Tsüngrem ket nung tsüktsü ya koda tetsübutsü ka!

³²Saka nenok tesangwa ngur külen nenoki timtem-toushi den meranga rara-a aremzükba tesüiba anogotem to bilemtetang.

³³Ano khen khenbo iba ama kangshiba purtem den lemsateper akümba mapang to bilemtetangma.

³⁴Kechiyong nenoki talenba nung alirtem dang aria bilem aser nenoki pei asoshi tali tajungba aser teti aliba rongsen ka lir ta meteta, pelashishia nenok rongsen laluba aremzük.

³⁵Anungji tajangzük tulu keta aliba nenok teimlaji teindokma.

³⁶Kechiyong Tsüngremi mulungbaji inyaktsü aser kechi nangzüka lir aji nenoki agizüktsü asoshi nenok dak taremzük alitsü tenüngdaktsü.

³⁷ Kechiaser, “Kenpiga dang lir, aji sür tarutsü alibaji, menua meli-i arutsü.

³⁸Saka kü temeshipuri tamang agi taküm alitsü, aser pai atsüngzükra, ni pa dak temulung machitsü.”

³⁹Saka atsüngzüka or samadokba pur rongnung asenokbo maten, saka tamang akaba aser pei tanela sota yutetba pur rongnung asenok lir.