Read njo IBRI 11 Bible Online

IBRI 11 - njo bible

IBRI 11

¹Tang teimla ayubatemji chichia kar ta, aser manguba osettemji atangji lir ta metetbaji tamang lir.

²Kechiaser tamang akaba agi alemli nisungtemi Tsüngremi junger ta agizüktetbaji angu.

³ Mangubatem nungi tanguba osettemji yanglua lir ta metettsüsa Tsüngrem O agi alima ajongaji yanglu ta tamang agi asenoki angateter.

⁴ Tamang agi Abeli Tsüngrem dang Kain dang nungi tali tajungtiba tenla ka, koba agi pa temeshi liasü ta kuli angu, aji tenla aser Tsüngremi pa sempet indang kuli agütsü, aser aji agi pa süaka ano pai maneni jembir.

⁵ Tamang agi Enok nem tasüba mungudaktsütsü asoshi pa meyipa agien aser pa mungui adok, kechiyong Tsüngremi pa meyipa agien. Kechiaser pa meyipa magiendang yongi pai Tsüngrem temulung chidaktsüba kuli angu.

⁶Aser tamang medeni Tsüngrem mulung chidaktsütsü makok, kechiyong shibai Tsüngrem dangi arudir, pai Tsüngrem lir ta, aser pa bushirtem nem tajangzük agütsüba lir ta amangtsüla.

⁷ Tamang agi Noai, mangubatem indang tekümdangtsü o Tsüngrem nungi ngua, pai Tsüngrem tsübua pei kibong kümtettsü asoshi rong renem, aser aji agi pai alima meimchir aitsü, aser tamang nungi adokba temeshi senmanger aküm.

⁸Tamang agi Abraham, kodang pa aja, pa senmangtsü asoshi kechi linük tangutsü liasü, aji agi apusoa aotsü pai tashi anga aser pa koleni aor memeteti pa apusoa ao.

⁹Tamang agi pa aener ama tenangzükba lima nung amunger küma, iba tenangzükba kasa pa senmangertem Isak aser Yakob den süki nung ali.

¹⁰Kechiyong kechi yimti teyangluba aser kisüba Tsüngrem lir, tamentakdak akaba iba yimti asoshi pai ata-a liasü.

¹¹ Tamang agi Saraia arishi anogo süitemer külen, nu menden nung metsü mashisa akümtsü tashi angu. Kechiyong shibai nangzük pa dang lai tsüngchir ta züngshi.

¹² Anungji oda tasü ama aliba nisung ka nungi yongsük nung anüng nung aliba petinutem ama aser tzüyimküm lisem ama mezüngdangteti tangzük.

¹³ Item ajak tenangzükbatem munguaka, talang nungi item ngua pela-a agizük, aser alima nung parnok aener aser amunger dang lir ta nangzüker külen, parnok tamang nung asü.

¹⁴Kechiyong shirnoki yamala o ashir, parnoki pei lima ka bushidagi ta jungkai adokdaktsür.

¹⁵Aser parnoki kechi lima nungi adoka aru, aji bilemteta ait asübo atangji meyipa aotsü mapang tajung ngula.

¹⁶Saka tang parnoki tajungba lima ka, oda kotak limaji aginür. Anungji Tsüngremi parnok asoshi pa parnok Tsüngrem ta ajatsü maker. Kechiyong pai parnok asoshi yimti ka renemogo.

¹⁷ Abraham atitang dang pai tamang agi tarongba tenla ka ama Isak tenla. Hau, shibai tenangzükbatem pelashishia agizük, oda

¹⁸ Isak dak ne metsü ajatsü ta shiba dang shia liasü, pai pei chir ka dang aliba tenla agütsüya liasü.

¹⁹Kechiyong Tsüngremi tasü nungi shia arudaktsütsü akok ta pai amang; hau, tasü nungi pai ano tatishitsü ama pa meyipa agizük.

²⁰ Tamang agi Isaki tarutsü aliba o indang ano Yakob aser Esau moatsü.

²¹Tamang agi Yakobi tasütsü mapang nung Yosef chirtem nisung shia moatsü aser pei ajok manung nendaker Tsüngrem külem.

²² Tamang agi Yosefi kodang pei tatembang anogo anasa aru, pai Israel nunger apusoa aotsü indang tetshi, aser pa teret indang ozüng agütsü.

²³ Kodang Mosa aso, tamang agi pa tsüraburi ita asem miima ayu, kechiyong parnoki pa tanur tobur tajung ta angu, aser parnoki chuba ozüng metsübu.

²⁴ Tamang agi Mosa tain kümer pai Farao jalar chir ta ajatsü menangzük.

²⁵Kechiyong kenpiga temenen pelaba tepela dang nungi Tsüngrem nüburtem den timatemtsübaji ang pai shimtet.

²⁶Aser Ijip rongsen ajak dang nungi Khrista asoshi maksüa ataladaktsübaji rongsen tuluba ta züngshi, kechiaser pai tajangzük shia anguba dak reprang.

²⁷ Tamang agi pai chuba ain adokba metsübui, Ijip lima toktsü. Kechiyong pai shiba mangu, pa dang angu ama aremzüka ali.

²⁸ Mezüng chirtem samatsübai parnok dak mekongshitsü asoshi, pai tamang agi Kümtettsü Benjong aser azü rüklokba maparenji yanglu.

²⁹ Tamang agi parnoki ali takong nung ama Temerem tzüyim ajanga ao, saka aji inyaktsü Ijip nungeri merangdang parnok tzü nung arakset.

³⁰ Tamang agi anogo tenet Yeriko lung jara meket nung aji lao.

³¹ Tamang agi Rahab nüktapangtalai itdangitertem pela-a agizük nung tashi mangartem den la mesama.

³² Aser ano ni kechi tali ashitsü? Kechiyong Gideon, Barak, Samson, Yefta aser Dawid, Samuel aser ainkartem, parnok ajak indang ni jembidi süra mapang agi meperitsü.

³³ Tamang agi parnoki yimlitem akok, temeshi mapa inyak, tenangzükbatem angu, molusongzü tebang nembang.

³⁴ Mi tashi remsep, nokpu nungi jenbu, tashi mait nungi tashi ita aküm; tongbang rara nung tashi ita ain, Bendanger temerangertem akok.

³⁵Tetsürtemi pei tasürtem tanaben shia aruba agi meyipa angu. Aser tangari tasü nungi shia aruba tajungba ngutettsü asoshi pei tekümzük magizüki timtemdaktsü.

³⁶Aser tangari tatala aser lisü agi arepba, hau, idakji chia talenba aser tsüngden chiokba tatitang angu.

³⁷ Parnok lung agi onset, parnok süngrangtsü agi rangma, parnok atitang, parnok nok agi tepset. Parnok sensaker aser rishikangshi aser mezüngmeshi küma, nabong aser san teküp abener jaja.

³⁸Iba lima parnok meyong tetemsü masü; arem nung, tenem nung, leprungki nung, aser ali ongken nung nemzüa senzü.

³⁹Aser parnok ajaki parnok tamang agi kuli nguaka, pa tenangzükbaji mangu.

⁴⁰Tsüngremi asenok asoshi langka tajungba renemtsü nung asenok medeni parnok teperi mekümdaktsütsüla.