Read njo IBRI 12 Bible Online

IBRI 12 - njo bible

IBRI 12

¹Anungji mepet tulu agi ama kuli aika agi asenok meketbang nung asenoki tenokdangtsü ajak aser sotaka aliba temenen toktsür,

²asenok tamang tetenzük aser tabensadaktsüba Yisu shibai pei jakdang aliba tepela asoshi maksü arema kangki timtem aremzüka Tsüngrem Chuba menden tajichilen amen, pa dak repranga asenok jakdang aliba tasemtepba nung taremzük agi asemtepdi.

³Ibayongji nenok aniseta makümtsü, mesüra melulatsü asoshi shibai temenen purtem nungi pa anema keptepbaji aremzüktet pa indang bilemdangang.

⁴Tang tashibo nenoki ano temenen anema raraba nung nenok azü tokshiba jenjang tashi ajurua mali.

⁵ Aser tajungshiba o koba agi techirtem den ama nenok den jembir, iba o nenoki amadok na? “Kü chir, Kibubai azüokba mezüngmeshi tesü, mesüra pai arütsüdang telula;

⁶Kechiaser Kibubai shiba dang meimer pai merenshir, aser pai agizükba techir dak pai azüker.”

⁷Nenoki aremzükbaji tazüokba asoshi lir, Tsüngremi techirtem den ama nenok dang benshir, kechiyong tebui memerenshiba ibala techir kar lir ma?

⁸Saka ajaki koba tazüokba nung aden, nenok ibala nungji medenra ajangla nenok techir masü, kida chir.

⁹Idakji chia asen ali nunger tebutemi asenok azüoktsü tim liasü aser asenoki parnok dang akhümtsübu. Ajangla asenoki tali tanelatem Tebu kübok tali bendanga agütsür taküm malitsü ama?

¹⁰Kechiyong parnoki kechi tim ta bilem, anogo ishika asoshi dang asenokji merenshi. Saka asenok tajung kümdaktsütsü, aser pa temeshiba lemsateptsü asoshi Tsüngremi asenok merenshir.

¹¹Temerenshi ajak atongba mapang nung tepelatsü masü, saka tejashitsü mesüker, aji saka tesünep tejang tangtsür.

¹² Anungji teka sangzüka lua alibaji ajungketang aser tashi maitba temokokji metongang,

¹³ aser tetsüng tatsük ji-ia maotsü asoshi, saka odang taneb ang anebtsü asoshi nenok tetsüng asoshi lenmang metonga yangluang.

¹⁴Nisung ajak den yimjung nung alitsü merangang, aser temeshiba koba makaibo Kibubaji mungutettsü iba temeshibaji arishia oang.

¹⁵ Taku süngra kar meiteta adoker timtem adokdaktsür külen iba jagi jentipur menena kümdakja lir, nenok shinga Tsüngrem taochi magizüki malitsüsa kümdangang.

¹⁶ Mesüra khen chiyungba su ka yong pei tambuti shilem ayokba Esau ama, shinga jabujarir mesüra yimsü toktsür makümtsüsa kümdanga liang.

¹⁷ Kechiyong tesülen kodang pai temoatsü senmang amangnü pa magizük, kechiaser pa tebu temulung meyipdaktsütsü asoshi Esaui nüktzü agi meranga bushiaka pai pa tebu dak aji mangu ta nenoki metet.

¹⁸ Kechiyong kongshitetba oda mi jangrua aliba tenem mesüra tammang aser teptepa ammangba aser yipru,

¹⁹aser jangzü ola tesashi aser ola tulu koba angashirtem joko parnok den talila o tejembima ta mepishi, iba tenem ka dangi nenok maru.

²⁰ Kechiyong shiruru kati iba tenem dak kongshira aji lung agi onseta südaktsütsü ta ozüng agütsübaji parnoki maremzüktet.

²¹ Iba tatalokbaji kanga dang tetsübutsüka asünung Mosai ashi, “Ni tetsübu agi atentener.”

²²Saka nenokbo Zion tenem aser taküm aliba Tsüngrem yimti oda kotak Yirusalem aser mezüngdangtetba telok kotak tenyartem,

²³kotak nung tenüng züluba mezüng asobatem mungdang tulu aser ajak o bendangba Tsüngrem aser tabensaba akümba temeshiba tanelatem,

²⁴ aser tasen tenangzükba tetsüngdai aisang Yisu, aser Abel dang nungi tali tajungba o jembiba azü rüklokba, item ajak dangi nenok arua lir.

²⁵ Shibai nenok den o jembir paji nenoki magizüki malitsü kümdangang. Kechiyong shibai alima nung tekümdangtsü o jembir, iba o magizüktetertemi mejenbutet süra, shibai kotak nungi tekümdangtsü o jembir, pa nungi meyipa ora, asenoki tali mejenbutettsü.

²⁶ Pa ola agi idangji alima anokshi, saka tang pai nangzüka ashi, “Ano khen ni alima dang masü, saka kotaka anokshitsütsü.”

²⁷Aser iba o, “Ano khen” ta asüba jagi manokshitettsüba osettem anünga alitsü asoshi teyangluba osettem tanokshitettsüba endokbaji sayur.

²⁸Anungji manokshitetba chuba yimli ka agizüktsüba asoshi asenoki agütsüdi.

²⁹ Kechiyong asen Tsüngremji ajak rongtoktsüba mi lir.