Read njo IBRI 13 Bible Online

IBRI 13 - njo bible

IBRI 13

¹Adianu Temeimtep Maneni Liang.

² Aener dang temeim sayutsü tama, kechiyong yamaji inyakdang kari memeteti kotak tenyartem anikettsü akok.

³Shirnok tepuokdak nung lir, parnok den tepuokdak ali ama, aser nenoka shi temang nung alinung shirnok rishikangshiba nung lir parnokji bilemtetang.

⁴Ajak rongnung ki ayimbaji tetushiba nung yuang, aser yipten memerük tekümdaktsü kechiyong Tsüngremi nüktapangtar aser jabujarir o bendangtsü.

⁵ Sen meimba nungi nenok pila-a liang aser nenok kechi aka idakji temulung süa liang; kechiyong Tsüngremi pei sasa shiogo, “Ni na kodanga metoktsütsü.”

⁶ Anungji asenoki tasü ita shiteter; “Kibuba kü teyarir, ni metsübutsü. Nisungi kü dang kechi inyaktettsü.”

⁷Nenok lenirtem shirnoki nenok dang Tsüngrem o jembir ao, parnok bilemtetang. Aser parnok taküm nungi adokba süngjang bilemdanga, parnok tamang ajizüker kümang.

⁸Yisu Khristaji yashi, tanü aser teti tatem maka kasa dang lir.

⁹Tapu tapu tesüngmangtsü tebangkatsü agi nenok tanishidaktsü, kechiyong chiyungtsü atema nenok tzüzüng-ozüngtem koba agi item benshibatemi tajangzük mangur aji agi masü, saka taochi agi temulungjang akangshidakjangma.

¹⁰Koba tekülemdak süki nung külemertemi chiyungtsü tim masü, ibala tenladak ka asenok kar.

¹¹ Kechiyong shiruru zü koba temenen atema tenlatsü temaba putiri tenladaki bener atur, item temangtemji tanendak tezülen aronger.

¹²Anungji Yisua pa pei zü ajanga nisungtem meshitetdaktsütsü asoshi süngkhümbong tezülen timatem.

¹³Anungji pa dang atalabaji asenokia aremzüka bener tanendak tesüleni asenoki pa dangi odi.

¹⁴Kechiyong yangi asenok tatem makai alidak yimti maka, saka asenoki tarutsü yimti bushir.

¹⁵Ajangla asenoki pa ajanga maneni Tsüngrem dang tenüngsang tenla oda pa tenüng nangzükba tebangmechi tejang tenladi.

¹⁶Tajung inyaktsü tesendokma, aser na kechi aka ibaji tangar den lemsatepangma, kechiyong ibala tenlatem agi Tsüngrem mulung achir.

¹⁷Nenok tanishirtem dang tashi angang, aser parnok kübok liang; kechiaser parnok tejashi agi mesüi tepela agi aji inyaktettsü asoshi tezüngdangba agütsütsü pur ama parnoki nenok tanela madak anüker. Kechiyong parnoki tejashi agi inyakra, nenok asoshi tajangzük maka.

¹⁸Nenoki onok asoshi sarasademang, kechiyong onoki ajak nung tushia linüa onok mulungsentsü tajung lir ta onoki amanger.

¹⁹Aser ni nenok dangi tanaben yakta meyipa agütsütettsü asoshi nenoki sarasademtsü ni kanga ajungshir.

²⁰Tang tesüneptsüba Tsüngrem, shibai tatem makaba tezüngzüktepba zü agi Sannüker tuluba, oda asen Kibuba Yisu tasü nungi shia arudaktsü,

²¹pa nükdang kechi temulung achir aji asenok dak Yisu Khrista ajanga inyaka pai mulungba tajung ajak nung perijang; pa dang sentsüwangshi teti tatem maka sang. Amen.

²²Saka adianutem, nenoki iba tajungshiba o aremzükang ta ni nenok dang mepishir; kechiyong ni o ishika züluogo.

²³Asen adianu Timoti chiokogo, aji metetang; pa yakta arura, ni pa dena nenok den ajuruteptsü.

²⁴Nenoki nenok tanishirtem aser temeshipurtem ajak nem salem agüjangma. Itali nungertemia nenok nem salem agütsür.

²⁵Nenok ajak den taochi liang. Amen.