Read njo IBRI 2 Bible Online

IBRI 2 - njo bible

IBRI 2

¹Anungji item ochiba nungi asenok oner maotsüsa, asenoki tangashiba o nung tali temulung agütsütsüla.

²Kechiyong kotak tenyartem ajanga jembiba o akang akanga aküm süra, aser tai aser tashi mangaba shiai taa tetemsü meyipa angu süra,

³ajangla koba tekümtet indang tamasa Kibubai jembi aser tangashirtem agi aji asenok dang tali akangdaktsüogo;

⁴aser Tsüngremia temaitsütem agi, tesüngmangtsütem agi, sayatenya jenti agi aser pai mulungba ama Tanela Temeshi sempettem lemsa-a agütsüba agi kuli agütsüogo, aji oda sür külen iba ama tekümtet tuluji asenoki sentokra, kechi koda asenoki jenbutsü?

⁵Kechiyong onoki koba tarutsü lima indang jembidagi, iba limaji Tsüngremi kotak tenyartem kübok meyutsü.

⁶ Tesem kar nung kuli agüja shia aliba ama: “Nai nisung indang tenoka bilemtsüsa parnokjia kechi? Mesüra nai nisung chir asoshi anebalutsüsa parnokjia kechi?

⁷Nai parnokji kotak tenyartem dang nungi tera tekübokba jenjang nung yanglu, nai sentsüwangshi aser tetushi agi parnok nem korang semtsü,[1] aser ne teka mapatem madak parnok yutsü.

⁸Nai kechisarena parnok tsüng kübok yutsüogo.” Kechiyong pai ajak parnok kübok ayu nung, pai parnok kübok mayuba kecha metoktsü. Saka tang tashibo ajak parnok küboki aitba asenoki mangur.

⁹Saka kotak tenyartem dang nungi shiba tera dang tekübokba kümdaktsü, pai Tsüngrem taochi agi nisung ajak asoshi tasüba menakdangtsüsa, pa tasü tekangshi nung sentsüwangshi aser tetushi korang asemba Yisu asenoki angur.

¹⁰Kechiyong, Tsüngrem shiba asoshi ajak lir, aser shiba ajanga ajak lir, pai sentsüwangshi dangi techir jenti anir arudang, timtem toushi ajanga parnok tabensaba tekümtet mezüng lenir kümdaktsütsü, aji pa asoshi tim liasü.

¹¹Kechiyong shibai meshitettsür, aser shirnok meshiteta lir, anapronglaji Tebuji kasa dang; anungji parnok dang adianutem ta ajatsü maki ashir.

¹² Anungji pai Tebu dang ashir, “Kü adianutem dang ni ne tenüng sangoktsütsü, parnok tekülemdak ni ne tenüngsang ken atentsü.”

¹³ Aser ano pai ashi, “Ni pa dak kü tamang ayutsü,” aser ano, “kü nem Tsüngremi agütsüba tanurtem den ni yangi lir” ta ashitsü.

¹⁴Item adianutemji shi aser azü asü nung Yisua parnok ama aküm aser meimchir yimya den lemsateper aküm. Tasüba ain akasang mojing madak takok angutsü asoshi pai ibai inyak,

¹⁵aser parnok tasütsü tsübuba nung parnok arishi tepiyong alena aliba nungi yamaji pai parnok ajak alangtet.

¹⁶Kechiyong pai kotak tenyartem dang yarir masü. Saka Lai nung ashiba ama, “Pai Abraham semchirtem yarir.”

¹⁷Anungji nisungtem temenen pungtoktsüba tenla ka agütsütsü asoshi, Tsüngrem tenzükba mapa nung paji yimlibilem aser temulung lemtetba temaba putirji akümtsü asoshi tesem ajak nung paji pei adianutem ama kümdaktsütsü tenüngdaktsü liasü.

¹⁸Kechiyong pai pei sasa tatitang ngua timtem angu nung, pai tatitang angurtem yaritsü akoker.