Read njo IBRI 4 Bible Online

IBRI 4 - njo bible

IBRI 4

¹Anungji pa anisüngzükdaki aitsü tenangzükba ka anünga lir nung, kodakirnaka sür nenok kar aitsü mokoki ngualir ta asenoki tsübudi.

²Kechiyong parnok dang ama atangji asenok dang osangtajungji sayutsüngiogo. Saka parnoki angashiba osangtajungji parnok asoshi tajangzük maliasü. Kechiaser tangashirtem den parnok tamang agi iba denji melungjem.

³ Kechiyong asenok shir amangogo, asenoki iba anisüngzükdaki air. Alima teyangluba mapang nungi mapatemji renema liaka, pai ashi, amato, “Kü ain adokba nung ni azüngashi amato, parnoki kü anisüngzükdaki maitsüla.”

⁴ Kechiyong tenetnü buba indang pai tesem ka nung yamai shiogo, “Aser tenetnübuba nung Tsüngremi pei mapa ajak nungi anisüngzük.”

⁵Aser idaki tanaben shiogo, “Parnoki kü anisüngzükdaki maitsüla.”

⁶Shirnoki Osangtajungji tamasa agizük, parnoki mamangba yong iba anisüngzükji magizük. Saka tangar nem ibaji agizükdaktsütsü mela.

⁷ Tsüngremi anogo ka ‘Tanü’ ta atakteta ayu, mapang talangka lir külen Tsüngremi Dawid ajanga jembi, “Tanü nenoki pa ola angashira, nenok temulung temerang.”

⁸ Kechiyong Yihusuai parnok nem anisüngzükji agütsü asübo, Tsüngremi ano tanga anogo ka indang mejembila.

⁹Anungji Tsüngrem nübur asoshi Amungnü anisüngzük ka anünga lir;

¹⁰kechiyong kechi koda Tsüngremi pei mapatem nungi anisüngzük, aji oda shibai pa anisüngzükdaki air, pai pei mapa inyakba nungi anenadoker.

¹¹Anungji kasa tashi mangaba ajanga shinga metsüktsü asoshi, asenoki iba anisüngzükdaki aitsü merangdi.

¹²Kechiyong Tsüngrem O taküm aliba aser teinyak, aser anatsü nok ajak dang nungi techiraba lir; aser taküm o tanela, tatentep o tenüngla ya ajak ateta bendangtetba, temulung tebilemba shisatsü aser tasa asaba yakta metetba lir.

¹³Aser pa madang nungi teyangluba taküm kecha miimbanga mali, saka shiba dang asenok telangzütsü kar, pa madang oset ajak mangsa aser sadaka lir.

¹⁴Ajangla Temaba Putir tulu ka, shiba anüngtem ajanga süiogo, oda paji Tsüngrem Chir Yisu, aji asünung aseni nangzükba tamangji asenoki akang akanga ametdi.

¹⁵Kechiyong asen mokokmintem nung aria bilemtsü makokba temaba putir kaji masü, saka asenok ama pa-a temenen meinyakaka kechisarena nung atitanga liasü.

¹⁶Anungji nüngdak mapang nung yaritettsüsa taochi angutsü aser asenoki taochi agizüktettsüsa asenoki tamang teimla agi taochi menden anasai odi.