Read njo IBRI 5 Bible Online

IBRI 5 - njo bible

IBRI 5

¹Kechiyong temenen asoshi sempet aser tenla tenlatettsüsa, nisungtem asoshi Tsüngrem tenzükba mapa atema nisungtem rongnung agiteta temaba putir shiaji shimteter.

²Pai tamashir aser aibelenertem den anükalema aremteter; kechiyong pa-a pei sasa mokokmin lir.

³ Anungji nisungtem asoshi dang masü, saka pa-a pei juri temenentem asoshia tenla tenlatsü tenüngdaktsü liasü.

⁴ Aser nisung shingaia pei sasa iba tetushi magir, saka Aron ajaba ama kodang Tsüngremi pa jadir, pai ibaji agir.

⁵ Aji oda Temaba Putir akümtsü Khristai pei sasa sentsü mewangshi, saka shibai pa dang yamai ashi, pai paji shimtet, “Na kü Jabaso, Tanü ni na aso.”

⁶Yamai pai ano tanga tesem ka nung ashir, “Melkizedek yimsü ama, Na tatem maka Putir.”

⁷ Kechiyong Yisui pa shi anogo nung, pa tasü nungi shibai kümzüktsü akok, pa dang kanga ayimtena aser nüktzü agi sarasadema mepishir külen, pai kanga akhüm tsübuba asoshi pai mepishiba angashi.

⁸Aser Jabaso süaka, pa timtem-toushi anguba agi tashi angatsü angazük.

⁹Aser pa tabensaba kümdaktsür külen, pa dang tashi angaba pur ajak asoshi paji tatem makaba tekümtet poktetdak aküm.

¹⁰Aser Melkizedek yimsü ama Temaba Putir ta Tsüngremi pa nungtettsü.

¹¹Pa indang onoki ashitsü jenti kar, saka nenok tenarong anüa aküm nung, teratettsü tasak.

¹² Kechiyong mapang papiga nungibo nenok tesayurtem kümer alitsüba liasü, saka tanaben Tsüngrem otem mezüng yimsü tetenzükba shisatsü nenok dang kari sayutsü tenüngdaktsü kümogo. Aser shirnok asoshi chiyungtsü temerang masü, mamatzü tenüngdaktsü, nenok ibala kümogo.

¹³Kechiyong mamatzü ajemertem temeshiba o nung mongin masü kechiaser pa kinü.

¹⁴Saka nisung tain, shirnoki yimya süba-a inyakba agi tajung majung bendangtettsüsa pei shisatsü azüokogo, parnok asoshi chiyungtsü temerangji lir.