Read njo IBRI 6 Bible Online

IBRI 6 - njo bible

IBRI 6

¹Anungji asenoki Khrista indang tetenzükba tesayubatem, oda mapa tasü nungi temulung meyipa, aser Tsüngrem dak tamang ayuba tsütsü,

²aser baptiba,[2] teka agi nemetba, tasürtem shia aruba aser teti tatem makaba obendangba indang tesayurtem tazüngdakji tanaben meyanglui mongin akümba jenjang dangi asenoki tejakleni aotsüla.

³Aser Tsüngremi dang melara, asenoki yamaji inyaktsü.

⁴Kechiyong shirnok khen tesangwa aküm, aser kotaker sempet menakdang, aser Tanela Temeshi lemsateper rongnung tatener aküm,

⁵aser Tsüngrem o tajung aser tarutsü putu aintem menakdang,

⁶saka parnoki atsüngzüka, aser pei tamangba toktsür ao, idangji parnok tanaben temulung meyiptsü asoshi parnok tanaben tasen küma yanglushitsüji tamakoktsü, kechiaser parnoki pei atema Tsüngrem Chir kangki nung tanaben angenloker aser pa yimjak nung maksüdaktsür.

⁷Kechiyong ali koba manung aiben aruba tzünglu tzü asüokogo aser shirnok asoshi aji züsentetogo, parnok asoshi tenüngdaktsü aonsotsü meitsü iba aliji Tsüngrem nungi temoatsü angur.

⁸ Saka iba li jagi ayidongtem dang meitsüra, aji tagidak maka, samesa atakatem bener arutsü anasa lir. Aser iba tatemji terongtoktsüba dang.

⁹Saka temeimbatem, onoki yamai jembiaka, nenok asoshibo tekümtet dak aketba tajungba osettem nenok asoshi kar ta onoki chichia meteta lir.

¹⁰Kechiyong nenoki temeshipurtem yariogo aser tanga yaridagi, aser aji agi Tsüngrem tenüng asoshi nenoki koba temeim sayu nenok mapa amatsüsa Tsüngremji ochi mashi masü.

¹¹Saka nenok nisung shiai tatem tonga nenok teimla nung tamang akatsü asoshi, iba temerangba kasa sayutettsü,

¹²aser nenok azümesen malitsü, saka shirnoki tamang aser taremzükba agi tenangzükbatem senmang amanger, parnok jilu ajizüker akümtsü, onoki mulunger.

¹³Kechiyong Tsüngremi Abraham dang nangzükdang, azüngashitsü pei dang tuluba shinga mali nung, pai pei sasa agi azüngashia

¹⁴ ashi, “Ni na atangji moatsüdi, aser atangji rendaktsüdi.”

¹⁵Aser aremzüka atatet nung pai tenangzükbaji angu.

¹⁶Kechiyong nisungi pei dang tuluba ka agi azüngashir, aser parnok bangsentepba ajak nung azüngashibaji o tatembang lir.

¹⁷Anungji Tsüngremi tenangzükba senmangertem dang pei tasa memelenshitetba tali aika sayutsü mulunga,

¹⁸memelenshitetba o ana, koba nung Tsüngremi tiyazü jembitsü makok, item agi onok jakdang ayuba teimla amettsü jenokbatem onoki tajungshitsü tulu ka angatsü asoshi pai züngyazüngko ka agi tetsüngdai ai.

¹⁹ Koba teimla Tanela rongnentsü ama, shitakba aser takangba teimla aser teyindangba telunglen alibai air, iba teimlaji onok kar.

²⁰ Iba telunglen jagi Melkizedek yimsü amato teti tatem makaba Temaba Putir ka kümer, jelia aor ka mesüka Yisu asenok asoshi ai.