Read njo IBRI 7 Bible Online

IBRI 7 - njo bible

IBRI 7

¹ Kechiyong iba Melkizedek, Salem Chuba, Tematiba Tsüngrem putir, shibai Abraham chubatem tepsetba nungi meyipa arudang ajuru aser moatsü,

²aser shiba nema Abrahami ajak nungi ter shilem nung ka lemzüka agütsü. Aser Melkizedek tetezü, mezüngbuba nung, “Temeshiba Chuba”, aser ano “Salem Chuba”, oda “Yimjung Chuba.”

³Pa tebu mali, tetsüa mali mesüra pa jakzükdak kin kidong tarensen otsü kecha mali, aser pa tetenzükba anogotem mesüra tatembang takümji mali, saka paji Tsüngrem Chir mesüka teti tatem maka Putir lir.

⁴Tang shiba nem tebudi Abrahami terakzükba osettem nungi ter shilem agütsü, iba nisung koda tulu liasü, aji bilemdangang.

⁵ Aser ozüng amato nüburtem nungi, oda parnok Abraham nungi jakzükaka, atangji Levi chirtem putir mapa angurtemi pei adianutem nungi ter shilem agitsü ozüng angu.

⁶Saka shiba kidong otsü parnok rongnungi mezüngdanger, pai Abraham nungi ter shilem agiogo.

⁷Saka mebangsentepi tilari tulur nungi temoatsü angur.

⁸Idaki külenbo tasütsüba nisungtemi ter shilemji angu. Saka idakjibo pa taküm lijen alir ta shibai kuli angu, pai ter shilemji agizüker.

⁹Aser Abrahami kodang tershilem agütsü Levi Shiba lir paia aji agütsüogo.

¹⁰Kechiyong Melkizedeki pa ajurudang, Levi ano pei tebu dak liasü.

¹¹Ajangla Levi putir yimsü ajanga tabensaba küma liasü asübo, kechiyong iba kübok nüburtemi ozüngji agizük, Aron yimsü ama mesükshi-i iba Melkizedek yimsü ama tanga putir ka adoktsü indang ano kechi tenüngdaktsü ali?

¹²Kechiyong kodang putir yimsü nungji temelenshiba ka adokdir, ozüngjia melenshitsü tenüngdaktsü akümer.

¹³Kechiyong shiba indang item o ashi, pa kidong tanga ka nungi adok, koba nungi tenla sabang nung tenzüktsü shinga madok, paji iba kidong nungi lir.

¹⁴Kechiyong asen Kibubaji Yihuda kidong nungi adok, aji tejangja lir. Iba kidong nungi putir yimsü indang Mosai kecha jembia mali.

¹⁵Aser shiba shi temang jakzükba indang ozüngi akangba ama masü, saka kodanga meraksatsüba taküm ain agi putirji aküm;

¹⁶iba Melkizedek mesükba nung tanga putir ka kodang adoker onoki ashiba oji tali ochi ta jangjatsür.

¹⁷ Kechiyong pa indang kuli ya agüja lir. “Melkizedek yimsü ama Na teti tatem maka putir.”

¹⁸Kechiyong mezüng ozüngji tashi maitba aser tagidak makaba asoshi anendaktsü.

¹⁹Kechiyong ozüngi kecha tabensaba mekümdaktsü aser iba melen teimla tajungba ka bener arutsü, koba ajanga asenoki Tsüngrem anasai aor.

²⁰Ano idakji chia ibaji azüngashiba ka medenibo inyaka mali, saka atangji tanga putirtembo azüngashiba ka medeni parnoki putirtem kümdakja liasü.

²¹ Saka pabo azüngashiba ka agi putir kümdakja lir; kodang Tsüngremi pa dang ya ashi, “Kibubai azüngashiba ka agi azüngashiogo; aser pai pei mulungjang memelenshitsü, na teti tatem makaba Putir.”

²²Anungji iba azüngashiba agi Yisuji kuli tajungba tezüngzüktepba ka kümdaktsü.

²³Aser atangji parnok aika dang putir akümtsü ataogo, kechiyong tasüba agi maneni inyaktsüba nungi parnokji noktanga liasü.

²⁴Saka Yisubo teti tatem maka alir pa memelenshitetba putir yimsüji kar.

²⁵Anungji shirnoki pa ajanga Tsüngrem dangi anasa arur, pai parnok asoshi Tsüngrem tsüngdang mepishitsütsüsa, pa teti taküm alir asünung, pai ajak nung jungjunga parnok kümzüktsü akoker.

²⁶Kechiaser paji temeshi, temerük, temenen nungi pila-a aliba aser tematiba kotak temalen ajungketa alinung Yisuji tetemsü Temaba Putir lir.

²⁷ Pa anogo shia item temaba putirtem mesüka tamasa pei menentem asoshi, ajisür nüburtem temenentem asoshi tenlatsü tenüngdaktsü maka, kechiyong pai kodang pei sasa tenla, pai ibaji teti asoshi khenyongi renemogo.

²⁸Kechiyong ozüng agi nisungtem mokokmin keter temaba putirtem asütsü shimtet, saka ozüng sülen aruba Tsüngremi azüngashiba o jagi tatem maka atema tabensaba kümdaktsüba Techir ka shimtetogo.