Read njo IBRI 8 Bible Online

IBRI 8 - njo bible

IBRI 8

¹ Tang onoki ashiba otem nung olen tongtibangji ya: Shiba kotak nung tamarenba Chuba menden tajichilen amen,

²aser nisungi yangluba masü, saka Kibubai yangluba temeshidak aser chichiba süki tenzüker ibala temaba putir ka asen meyong lir.

³Kechiyong temaba putir shiaji sempettem aser tenlatem tenlatsü asoshi shimteter. Anungji tenlatsü asoshi pa-a langka akatsü tenüngdaktsü.

⁴Tang pa alima nung ali asübo pa putir mekümla, kechiaser ozüng amato sempet tenlartem lir.

⁵ Parnok tekülemdak kotak oset ajizükba aser akhüm dang lir. Oda Mosai semtu yangludi ta alidang Tsüngremi pa kümdangdaktsüba ama; kechiyong Tsüngremi Mosa dang ashi, “Tenem nung ne dang tajizüktsü sayuba amato ajak yanglutsü kümdangang.”

⁶Saka tang tezüngzüktepba tajungba nung pa tetsüngdai aiba aküm. Oda Yisui tajungtiba tenzükba mapaji angu,

⁷kechiaser mezüngbuba tezüngzüktepba nungji tai mali asübo tanabuba tezüngzüktepbaji nüngdaka melila.

⁸ Kechiyong parnok dak tai ngua pai ashi, Kibubai ashir, “Ni Israel kidong den aser Yihuda kidong den, Tezüngzüktepba tasen ka yanglutsü, ibala anogo arur;

⁹Saka Ijip lima nungi parnok anitettsü, ni parnok teka nung ametba anogo nung, ni parnok tsüraburtem den tezüngzüktepba yangluba amato tezüngzüktepba tasenbaji malitsü, kechiaser Kibubai ashir, parnoki kü tezüngzüktepbatem nung menoktak, aser ni parnok mereprang.

¹⁰Kechiyong Kibubai ashir, item anogo süir külen, Israel kidong den ni iba tezüngzüktepba yanglutsü; parnok temulung nung kü ozüngtem ni ayutsü, aser itemi parnok temulungjang nung ni zülutsü; aser ni parnok Tsüngrem asütsü, aser parnok kü nübur asütsü.

¹¹Aser Kibuba metetang ta parnok nisung shiai pei yimer aser pei adianu dang mesayutsü, kechiyong parnok rongnung tilatiba nungi tulutiba tashi parnok ajaki ni metettsü.

¹²Kechiyong ni parnok tai asoshi yimlibilemtsü, aser parnok temenen ni joko mebilemtettsü.”

¹³Tasen tezüngzüktepba ta ashiba jagi mezüngbubaji pai tejen kümdaktsüogo; aser koba tejen küma süia odagi aji yakta samatsü.