Read njo IBRI 9 Bible Online

IBRI 9 - njo bible

IBRI 9

¹Tang ano mezüngbuba tezüngzüktepba meyong tekülemba yimsü ozüngtem, aser iba ali nunger tekülemdak ka ta liasü.

² Kechiyong süki ka yanglua liasü, aser mezüngbuba taktang nung milendong aser langbang aser Tsüngrem madang ayuba amtsük liasü, ibaji temeshidak ta ajar.

³ Aser teyindangba sü tanabuba telunglen temeshitiba tekülemdak ta ajaba süki lir.

⁴ Idakji liangmesen arongdak hon tekülemdak ka, aser ajak meketa hon agi yangpangba Ozüng Süngden ka liasü, kechi nung mana aliba hon po aser temechi adokba Aron ajok aser tezüngzüktepba lungpaktem liasü;

⁵ aser iba temalen sentsüwangshi cherubim yimlibilem menden akhümbanga liasü. Item oset indang tang onoki rasa-a jembitsü makok.

⁶ Tang yamaji renemer külen, putirtemi mezüngbuba süki-i maneni tua tekülemba mapa inyak.

⁷ Saka tanabuba jagibo temaba putir dang küm nung khen air, saka azü medeni masü, iba zü pai pei asoshi aser nüburtem temenen asoshi tenlar.

⁸Aser süki mezüngbuba ali tashi temeshidaki atuba lenmang ano jungkai madok ta, Tanela Temeshi-i sayur.

⁹Iba süki tang aliba mapang asoshi tatishitsü ka lir. Iba jagi tekülemertem dang mulungsentsü indang mabensadaktsütetba sempettem aser tenla agütsür.

¹⁰Saka chiyungtsü, tajemtsü aser merüktetbatem tapu aika aser temang asoshi ozüngtem koba tanaben teyanglushiba mapangji matong tashi benshitsü atema agütsü.

¹¹Saka tarutsü tajungbatem meyong temaba putir ama kodang Khrista aru, teka agi meyangluba süki, oda iba tuluba aser tali tabensaba süki ajanga ai.

¹²Aser nabong-o nashi pungchi chanu zü masü, saka pei zü bener pai teti tatem makaba tekümzük ngua temeshidaki teti asoshi khenyongi ai.

¹³ Kechiyong menenbatem dak nabong aser nashi pungchi zü aser nashi lamen aut rükloktsüba agi shi temerükba atema meshiteter süra,

¹⁴ajangla Khrista shibai teti tatem maka tanela agi tarak meketi pei sasa Tsüngrem dang tenla, pa zü agi taküm Tsüngrem tenzüktsü atema nenok mulungsentsü tasü mapatem nungi koda tali merükdaktsür?

¹⁵Kechiaser mezüngbuba tezüngzüktepba kübok nung ozüng raksaba temenentem nungi parnokji alangzüktsü asoshi pa tasübaji atalok nung shirnoksa ja-a lir, parnoki teti tatem makaba tenangzükba senmangji agizüktsü asoshi Khristaji tasen tezüngzüktepba meyong tetsüngdai aisangji lir.

¹⁶Kechiyong kong tezüngzüktepba ka densema lir, idakji iba yanglusang tasübaji ochi ta kuli agi sayutsü tenüngdaktsü.

¹⁷Kechiyong tasüba sülenjiang tezüngzüktepbaji ataloker. Kechiaser iba tezüngzüktepba yanglusangji taküm alidangbo aji amshitsü makok.

¹⁸Aji oda mezüngbuba tezüngzüktepbajia azü medenibo metenzük.

¹⁹ Kechiyong kodang Mosai ozüng amato temelaba ozüng ajak nüburtem ajak madang jembitem, pai tzü, san-züng temeremso aser esop den nashi pungchi chanu aser nabong zü bena aru, aser kaket o nüburtem ajak dak aji rükloktsü,

²⁰aser pai ashi, “Ibai tezüngzüktepba azü koba nenok atema Tsüngremi mela.”

²¹ Idakji chia, pai süki aser tekülemtsü po ajak nung yamajisa azü rükloktsü.

²² Atangji kechisarena azü agi merüktetdaktsütsüla ta ozüng agi akhanger, aser azü metokshi-i temenen tatokba maka ta ni ashitsü akok.

²³Anungji item agi kotak nung aliba indang ajizükbatem meshitettsü tenüngdaktsü liasü, saka kotak meyongtemsa item dang tajungba tenlatem agi meshitettsü tenüngdaktsü liasü.

²⁴Kechiyong chichiba tekülemdak mesükba ajizüka teka agi yangluba temeshidak kati Khristai mai, saka tanga pa asenok asoshi Tsüngrem jakdang adoktsü kotakisa ai.

²⁵Saka temaba putir tangar zü bener küm shia tekülemdaki aiba ama, Khristai aiben pa sasa tenlatsü mai.

²⁶Aji mesüra alima meyangludang nungi pa aiben timtem ngua lila. Saka tang pa pei sasa tenlaba agi temenen aidoktsü asoshi pututem tatembang nung teti asoshi khen dang jungkai adokogo.

²⁷Aser kechi koda nisung khen dang asütsüla, aji sür külenbo obendangba arur,

²⁸ aji oda nisung jenti meyong temenen khu abentsü asoshi Khristai khen tenlar külen, pa tanaben temenen medeni pa asoshi alartem dangi tekümtet atema jungkai adoktsü.