Read njo YAKOB 1 Bible Online

YAKOB 1 - njo bible

YAKOB 1

¹ Tsüngrem aser Kibuba Yisu Khrista tenzüker, Yakob nungi prokshia aoba kidong terana dangi salem.

²Kü adianutem, kodang nenoki tatitang aika angur,

³nenok tamang atitangba agi taremzükba adokdaktsür, ta meteta aji kanga tepelatsü ta züngshiang.

⁴Aser nenok kecha nunga manüngi, teperi aser tabensa akümtsü asoshi, iba taremzükbaji pei mapa teperi südakjang.

⁵Saka nenok rongnung kar shisatsü agi anünga lira, atala-a marütsüi angati ajak nem agütsüba Tsüngrem dang pai meshidakjang, aser aji pa nem agütsütsü:

⁶Saka marendaki amanga pai meshidakjang, kechiaser shibai arentaker, pa mopung nung temaleni ona atuba tzüyim tzüsem ka ama lir,

⁷Kechiyong ibala nisungi Kibuba nungi langka angutsü ta tebilem,

⁸pa temulung ana atenba nisung, pei yimya ajak nung mesüngjem.

⁹Saka sensaker adianu ka pa pei ajemaluba tia nung Tsüngremi ajungketra, pai ya asoshi pela-ang;

¹⁰ aser takari pa pei ajemaludaktsüba nung pela-ang, kechiyong ai naro ama pa aremtsü.

¹¹Kechiaser mopung kanga tatsük den anü adoker, aser ai azüladaktsür, aser naro jetzüka aor, aser pa tereprangtsü tobur tajung samar, yamaji takar nisung pei mapa nung rema aotsü.

¹²Shibai tatitang aremzüker pa temoatsüba, kechiyong pai tatitang koker külen, taküm korang, koba Kibuba dang meimertem nem agütsütsü pai nangzük, aji pai angutsü.

¹³Kodang kar atitangdir, Tsüngremi ni atitanger ta nisung shingaia teshi; kechiyong tamajung agi Tsüngremji atitangtsü makok, aser paia shinga matitanger.

¹⁴Saka nisung shia kodang pa pei azüabung agi atsüdir, aser mesüzüka odir pa atitanger.

¹⁵Idangji azüabungbaji kodang mashisa kümdir temenen asor: aser kodang temenenji tain kümdir tasüba adokdaktsür.

¹⁶Kü meimba adianutem, nenok tekülakokdaktsüma.

¹⁷Sempet tajung ajak aser tabensaba ajak temaba nungi lir, aser tesangwatem Tebu, shiba melenshiba aser meyipshiba akhüm mali, pa nungi item ajak lir.

¹⁸Pai yangluba mezüng tejang tapu ka asenok asütsü asoshi, pai pei mulungba amato ochi o agi asenok sodaktsü.

¹⁹Kü meimba adianutem, ya metetang, nisung shia tangashitsü kara-ang, tejembitsü meilungi sang, aser ain adoktsü meilungi sang.

²⁰Kechiyong nisung ain adokba agi Tsüngrem temeshiba meinyaker.

²¹Anungji nenoki memerükba ajak aser tamajung moshia aliba endoka, amenloker meidaktsüba o kobai nenok tanela kümzüktsü akok, aji ajemalua agizükang.

²²Saka nenok pei sasa külakokja lir, o tangashir dang mekümi teinyaker kümang.

²³Kechiyong kari o teinyaker mesüi tangashir dang kümra, pa tanüdangtsü nung pei sasa pei tejak reprangba nisung ka mesüker.

²⁴Kechiaser pai pei sasa repranger aor, aser pa komama nisung liasü pai idangyongji amar.

²⁵Saka shibai chichiba ozüng, nüji ozüng repranger, aser maneni inyaker aser angashir amaba dang masü, saka mapa inyaker akümer. Iba nisung pai inyakba nung moatsütsü.

²⁶Nisung kari temulung külakokdakja pei temeli mazüoki pei sasa temeshi ta bilemra, iba nisung tamangbaji amajok.

²⁷Tebu malirtem aser amitsürtem, parnok timtem toushi nung reprangba aser alima nungi pei sasa tarak meketi ayuba, ya asen Tebu Tsüngrem madang tasüngtet aser temerük yimsü lir.