Read njo YAKOB 2 Bible Online

YAKOB 2 - njo bible

YAKOB 2

¹Kü adianutem, sentsüwangshiba Yisu Khrista asen Kibuba dak nenok tamang kar, aser tejak ajia nenoki shinga tagizük.

²Kechiyong nenok sentep kidangi hon küri aser süoshi sentsüprang sobur nisung ka arura aser ano süoshi tejen sobur sensaker ka arura,

³nenoki sentsüprang süoshi sobubaji tali ajiteta pa dang ashir, “Na idaki tajungdak menang.” Saka sensakba dangji nenoki ashir, “Oagi noktaka liang, mesüra kü tsüng züng nung yangi menang” ta shira;

⁴nenoki nenok rongnung balala bendanga benshir masü no? Aser tamajung tebilemba agi o bendangertem akümer masü no?

⁵Kü meimba adianutem angangjo, alima nung shir sensakertem lir, Tsüngremi parnok tamang nung takartem akümtsü aser pa meimertem dang pai nangzükba yimli senmang amangtsü meshimtet ama?

⁶Saka nenoki sensakerji maksütsür. Takartem jagi nenok rishikangshir masü no? Parnoki nenok obendangdaki atsür maor ama?

⁷Koba tenüng tajung agi nenok nüngtugu akümer, iba tenüng parnoki matalar no?

⁸ Aji saka Laishibai ashiba amato, “Ne kiyonger dang pei ama meimang,” iba tamaren ozüng nenoki atalokdaktsüra, nenoki tajung benshir.

⁹Saka nenoki tejak repranga agizükra, nenoki ozüng, raksa-a temenen menar.

¹⁰Kechiyong shibaisa ozüng ajak benshir, saka ka nung pa metsüdaker, pa ajak nung tai akümer.

¹¹ Kechiyong shibai “nüktapangta tebenshi” ta ashi, pai ano, “Nai tetepset” ta ashi. Tang nai nüktapangta mebenshiaka, nisung tepsetra, nai ozüng ajak raksar.

¹²Nüji ozüng agi nenok obendangba angutsü pur ta meteta aji oda nenoki jembiang, aser aji oda inyakang.

¹³Kechiyong shibai yimlibilem mesayur, pa dang yimlibilem mesayui Tsüngremi o bendangtsü, saka yimlibilemi o bendangba madak tatok angur.

¹⁴Kü adianutem, nisung kati pa tamang lir ta shira saka pa mapa melira, kechi tajangzük? Iba tamang jagi pa kümzükteter ma?

¹⁵Adianu mesüra adianutsür ka mangsa aser anogo shia chiyungtsü agi anünga lira,

¹⁶aser nenok rongnung kati parnok dang ya oda shira, “Junga oang, lemlema aser tepok sünga liangma,” saka temang asoshi nüngdak kecha parnok nem magütsüra, aji kechi tajangzük?

¹⁷Yamaji tamanga mapa melira, pa kija tasü lir.

¹⁸Saka kari ya ashitsü akok, “Na tamang kar aser nibo mapa kar, Mapa medeni ne tamang kü dang sayuang, aser nia kü tamang kü mapa agi sayudi.”

¹⁹Tsüngrem ka dang ta nai amanger. Junger, temenen tanelatemia amanger aser atentener.

²⁰Saka Oh tamashi nisung, mapa medeni tamang tapunga[1] ta nai meteter ma?

²¹ Asen tebou Abrahami pei chir Isak tenlaba agi pa memetendaktsü no?

²²Tamangji pa mapa yariba liasü, aser mapa agi tamang abensadaktsü ta nai angur.

²³Aser Abrahami Tsüngrem dak amang, aser pa atema aji temeshiba ta züngshi, koba Lai-i ya ashi aji atalok, aser pa dang Tsüngrem tembar ta aja.

²⁴Tamang agi dang masü, saka mapa agi nisung metendaktsür ta nenoki angur.

²⁵ Aser yamaji Rahab nüktapangtalai osang abenertem anendaktsü, aser tanga lenmangi odaktsü nung, iba mapa agi la memetendaktsü no?

²⁶Kechiyong kechi koda tanela medeni temang tasü, aji oda mapa medenibo tamangjia tasü lir.