Read njo YAKOB 3 Bible Online

YAKOB 3 - njo bible

YAKOB 3

¹Kü adianutem, obendang taretba asenoki angutsü ta meteta, nenok rongnung aika tesayur teküm.

²Kechiyong tesem aisü nung asenok ajaki metsüdaker. Kati o nung memetsüdakra, paji tabensa nisung, temang rangbena azüokteter.

³Kortem asenoki ashiba angadaktsütsü asoshi asenoki tebang nung lakem enoktsüra asenoki parnok temang rangben meyipdaktsür.

⁴Ajiang ano rongtem kanga tulu aser mopung tesashi agi oner oaka, süng tila ka agi tanishibai koleni mulungdir, ilenjagi meyipdaktsür.

⁵Yamajisa temelia tenük-telen tila ka, saka asüküm tulu jembir. Ajiang koda mi tila agi arem tulu aronger.

⁶Aser temeliji mi ka, aser tenük-telen rongnung temeli ya memeshiba tulu lir. Iba yagi temang rangben menendaktsür aser yimya talungtsü mi adokdaktsür.

⁷Kechiyong shiruru ozü, ayazüba aser tzüyim nung aliba tapu ajak meimchiri kiset küma azüoker, aser azüokogo.

⁸Saka temeli azüoktsü nisung shingaia makoker; ya tesüngjem makaba tamajung tasütsü mim agi sünga lir.

⁹ Iba yagi asenoki Kibuba aser Tebu tenüng asanger, aser iba yagi Tsüngrem mesüka yangluba nisung atakatemer.

¹⁰Tebang kasa nungi tenüngsang aser atakatem adoker. Kü adianutem, itemi yamaji masütsüla.

¹¹Tzü apokdak kasai tzü tanang aser taku adokdaktsür ama?

¹²Kü adianutem, mungudongi totzü süngjang mesüra tsükmenatzü zü nung mungujang tangtettsü ama? Mesüra metsü-tzü apokdak nungi tzü tanang madokdaktsütet.

¹³Nenok rongnung teshiteter aser tangateter shiba lir? Pai pa taküm tajung agi shisatsü ajemaluba nung pa mapa sayudakjang.

¹⁴Saka nenok temulung nung taku aser mokokaji aser telemsa lira. Ochi anema tiak tesang aser tiyazü tejembi.

¹⁵Iba shisatsü temaba nungi aluba masü, saka alima, shi aser mojingi agütsüba.

¹⁶Kechiyong kechi nung mokokaji aser telemsa lir, Idakji rarabangsen aser mapa tamajung ajak lir.

¹⁷Saka temaba nungi aluba shisatsüji tamasa temerük, ajisür tesünep, ajemalu, temulungjang tanük, yimlibilem aser tejang tajung agi sünga lir, tatitaktsü maka anemsü maten.

¹⁸Aser yimjung yanglurtemi tesünep nung temeshiba süngjang proker.