Read njo YAKOB 4 Bible Online

YAKOB 4 - njo bible

YAKOB 4

¹Nenok rongnung tongbang rara aser leptepba kong nungi adoker? Itemi nenok tenük-telen nung raraba kechi azüabung lir, iba nungi adoker masü no?

²Nenoki azüabunger saka mangur. Nenoki tepseter, nükshir, saka munguteter. Nenoki rarar aser lepteper. Nenok kecha maka, kechiaser nenoki memeshir.

³Nenoki meshir saka mangur, kechiaser nenoki pei azüabungba nung endoktsü asoshi nenoki aibelena meshir.

⁴Nenok tamang makatetba purtem, alima tembarji Tsüngrem anemer lir ta nenoki memetet no? Anungji shirisa alima tembar kümnür, pai pei sasa Tsüngrem anemer akümer.

⁵Mesüra tanela koba pai asenok dak lidaktsü, iba tanelai asenok asoshi tenük merema yongyar; iba o Laishibai amajok nung jembir ta nenoki bilemer asü?

⁶ Saka pai taochi tuluba agütsür. Anungji Laishibai ashir, “Tsüngremi asükümer noktanger, saka ajemalur nem taochi agütsür.”

⁷Anungji Tsüngrem kübok liang, aser mojing noktangang aser pai nenok nungi jena aotsü.

⁸Tsüngrem anasai arung aser pai nenok anasai arutsü. Nenok temenen purtem, nenok teka merükang; nenok temulung ana adenba purtem, nenok temulung meshitetang.

⁹Jashia mang yimang aser jebang; nenok menüba tajepba kümang, aser nenok pelaba khuret kümang,

¹⁰Kibuba madang nenok sasa ajemalua kümang, aser pai nenok uludaktsütsü.

¹¹Adianutem, nenok kati ka anema tejembi. Shibai pei adianu anema jembir, aser pei adianu o bendanger, pai ozüng anema jembir, aser ozüng o bendanger. Saka nai ozüng o bendangra, na ozüng benshir masü, saka obendanger ka akümer.

¹²Ozüng agütsür aser o bendanger ka lir, oda shibai kümzüktsü aser samatsütsü akoker, pa ka dang lir. Saka ne kiyonger o bendanger na shiba?

¹³Nenok shiri tanü mesüra asüng onoki iba yimti-i aotsü, aser küm ka idakji lia shishia ajangzüktsü ta ashir, tang ajiangjo.

¹⁴ Saka asüngji kechi adoktsüar nenoki memetet. Nenok taküm kechi? Kechiyong kenpiga angur aser sama-a aoba tangu, aji nenok lir.

¹⁵Iba melen nenoki ya-ang ashitsü tim, “Kibubai mulungra, onoki taküm lia, mapa ya mesüra aji inyaktsü.”

¹⁶Saka tang nenoki nenok mezümeküm nung ulur, ibala mezümeküm ajak temenen.

¹⁷Anungji shibai mapa tajung inyaktsü meteter aser meinyaker, pa asoshi aji temenen.