Read njo YAKOB 5 Bible Online

YAKOB 5 - njo bible

YAKOB 5

¹Tang ajiangjo, takartem, nenok madaki kechi timtem arudagi, aji asoshi jebang aser ayimtenang.

² Nenok rongsen sama-a aor, aser nenok süoshi tarütsü agi achir.

³Nenok hon aser taribi song agi chimar; aser parnok songji nenok anema kuli asütsü, aser mi ama parnoki nenok shi achitsü. Nenoki tatem anogo atema nenok rongsen rizüng.

⁴ Ajiang nenok alu arur ayangertem, taa koba nenoki tekülak agi ayu, iba jagi ayimtener; aser alururtemi ayimtenba kotak telok Kibuba tenarongi yiogo.

⁵Nenoki alima nung sadok-sadoka ali nung tepelatsü angu. Tetepsetba anogo nung nenoki nenok temulung jangratemdaktsü.

⁶Nenoki temeshipurji aitsür. Aser nenoki pa tepset; pai nenok menoktanger.

⁷Anungji adianutem, Kibuba aruba tonga arema liang. Ajiang aluyimeri mezüngbuba aser tesübuba tzünglu maru tashi arema alu senti süngjang asoshi atar.

⁸Nenoka arema liang; nenok temulung akang akanga noktakang, kechiyong Kibuba arutsü mapang anasa lir.

⁹Adianutem, nenok o bendangba mangutsü asoshi kati ka anema tenemnem. Ajiang, Obendangsang kishi züngdang noktaka lir.

¹⁰Adianutem, ainkartem shiri Kibuba tenüng nung jembi, parnokji timtem aremzükba aser talangka azüzükba tatishitsü ama agiang.

¹¹ Ajiang, shiri aremzük parnok dang asenoki temoatsüba ta ajar. Yobi aremzükba indang nenoki angashiogo, aser Kibubai tatem nung pa dang koda yari. Kechiaser Kibubaji aria bilemba aser yimlibilem agi sünga lir.

¹² Saka kü adianutem, ajak dang tongtibaji ya lir, nenoki kotak agi aser alima agi mesüra tanga kecha agia azüngashi tesü. Saka nenok obendangba nung matentsü asoshi nenok o “hau” süra “hau” “nunga” süra “nunga” ta sang.

¹³Nenok rongnung kar toushia lir ma? Pai sarasademang. Kar pela-a lir ma? Pai tenüngsang ken tenang.

¹⁴ Nenok rongnung kar shiranga lir ma? Pai arogo tamburtem ja-ang aser Kibuba tenüng nung parnoki pa dak totzü mezüja, pa asoshi sarasademjang.

¹⁵Tamang sarasadem agi shirangbaji anebtsü, aser Kibubai pa mesotsü; aser pai temenen benshia alinunga aji pa dang adoktsü.

¹⁶Anungji nenok anebtsü asoshi kati ka madang temenen nangzükang, aser kati ka asoshi sarasademjang. Temeshipuri sarasademba aser inyakba nung tashi lir.

¹⁷ Asenok yimya ama Elija-a nisung liasü, aser pai tzünglu marutsü asoshi akang akanga sarasadem; aser alima nung küm asem sür ita trok tzünglu maru.

¹⁸ Aser pai tanaben sarasadem aser anüngi tzünglu yok, aser ali-i pei tejang tangtsü.

¹⁹Kü adianutem nenok rongnung kar ochi nungi mashileni ora, aser kati pa meyipa arudaktsüra,

²⁰ shibai temenen pur ka pa mashi lenmang nungi meyipa anir arur, pai taküm ka tasü nungi kümzüker, aser temenen jenti nembangtsü ta pai metetang.