Read njo 1 PETER 2 Bible Online

1 PETER 2 - njo bible

1 PETER 2

¹Anungji Kibuba taochi lir ta nenok menakdanga lira, ajangla tamajung ajak aser tekülak ajak aser anemsü, aser mokokaji, aser tamajung jembiba ajak endokang.

²Aser tasen asoba kinütem ama nenok tekümtet dangi aintsü asoshi tanela mamatzü temeja asoshi jangra-ang.

³ Kechiaser Lai-i ashiba ama “Nenoki Kibuba temeimji tendangogo.”

⁴Nisungi atangji pa jentoktsü, saka Tsüngrem tsüngdang teshimtet aser senti taküm lung ka, pa dang arua;

⁵nenok taküm lungtem ama Yisu Khrista ajanga Tsüngremi agizüktettsü tanela tenla tenlatsü, temeshi putir telok asütsü asoshi, tanela ki ka küma nenok yangluang.

⁶ Kechiaser lai nung ya lir, “Ajiang ni Zion nung teshimtetba aser senti tongti kinük lung ayur; aser shibai pa dak amangdir, pa mak mesüdaktsütsü.”

⁷ Ibai nenok tamanger asoshi senti lungji lir; saka mamangertem asoshi: “Kisürtemi koba lung jentok, aji kinük nung tongtiba aküm.”

⁸ Aser, “Ibai parnok atema temetsüdaktsü aser tenokdangba lung.” Parnoki tashi manga nung, o nungji metsüdaker. Saka aji asoshi parnok shimteta liasü.

⁹ Saka shibai ammang nungi pei tesüngmangtsü tesangwa dangi nenok aja, nenokia pa tajungtiba jungkai adokdaktsütsü asoshi nenok teshimtetba kin, chuba putir telok temeshi kin, aser Tsüngrem pei agitsü nüburtemji nenok lir.

¹⁰ Khen mapangbo nenok Tsüngrem nübur mesüi liasü. Saka tangbo nenok Tsüngrem nübur kümogo. Khen mapang nenoki Tsüngrem taochi magizüki liasü, saka tangbo nenoki pa taochi agizükogo.

¹¹Temeimbatem, nenok alima nung aenertem aser amungertem ama, tanela anema raraba shi azüabungba nung nenok pila-a liang ta ni nenok dang mepishir.

¹²Bendangertemi koba indang nenok mapa tamajung inyakertem ta nenok anema jembidagi, iba indang nung parnoki nenok mapa tajung ngua, pa tesemdangba anogo nung Tsüngrem tenüng sentsüwangshidaktsütsü asoshi parnok rongnung nenok jaklaliro tajung sang.

¹³Nenoki Kibuba atema nisunger bangdak ajak küboki iang; oda chuba dang pa ajak dang temaba ama,

¹⁴aser governortem dang mapa tamajung inyakertem merenshitsü aser mapa tajung inyakertem tenüng asangtsü atema Kibubai parnok yok ta nenoki parnok dang tashi angang.

¹⁵Kechiaser yamaji nenok tajung inyakba agi tamashi nisungtem tamashibaji ola madokdaktsütsü Tsüngremi mulungba lir.

¹⁶Nenok nüji ama, aji saka nenok nüjibai tamajung amokbangtsü mebenshi-i Tsüngrem lar ama liang.

¹⁷Nisung ajak dang akhüm tsübuang. Adianu telungjem meimang. Tsüngrem tsübuang, chuba dang akhüm tsübuang.

¹⁸Kilirtem, nenok akhümtsübu ajak agi temeim aser ajemaluba kiburtem dang dang masü, saka tetokdak kiburtem danga tashi anga-a pei kiburtem kübok liang.

¹⁹Kechiyong kari Tsüngrem tsütsü mulungsentsü tajung aliba yong tim mesüi timtem ngua aremzükra, Tsüngrem madang aji tagizüktsüba lir.

²⁰Kechiyong nenoki kodang temenen menar aser aji asoshi tazükba angur aji aremzükra, kechi nüngsang ali? Saka kodang nenoki tim mapa inyaker aser aji asoshi timatemer, aji aremzükra, Tsüngrem madang nenok temoatsü tagizüktsüba lir.

²¹Kechiyong aji asoshi nenok aja, kechiaser nenok pa tsüngsü nung anitaktsü asoshi Khristaia nenok asoshi timatem aser nenok asoshi tatishitsü ka yutsür ao.

²² Pai temenen kecha meinyak, mesüra pa tebang nung tiyazü kecha mangu.

²³ Kodang pa atala, pai meyipa matala, kodang pa timatem, pa tsüngken metsübudaktsü. Saka ochishia obendangba nem pai pei sasa bendanga agütsü.

²⁴ Temenen nungi pila-a asenok sür külen temeshiba atema taküm alitsü asoshi pai pei sasa kangki nung pei temang nung asen menen aben, aser pa tazükba zübu agi asenok aneb.

²⁵Kechiyong santem ama asenok mashileni oya liasü, saka tang asenok Sannüker aser asenok tanela anüksang dangi meyipa aruogo.