Read njo 1 PETER 3 Bible Online

1 PETER 3 - njo bible

1 PETER 3

¹ Yamajisa, kinungtsürtem, nenok kinungpur kari Tsüngrem O tashi manga-aka, aji saka pei kinungtsür

²nenok akhümtsübu aser temerük jaklaliro ngua, aji agi Tsüngrem o medeni parnok ajangzüktettsü asoshi pei kinungpur kübok liang.

³ Nenok temechiba ku aser hon sobutsü mesüra süoshi sobuba ibala tema tazütsü tesüma.

⁴Saka telunglen temulungjang nung, ajemalu aser tesüngjem tanela, mesamatetba sobutsü sobuang. Ibala tanela Tsüngrem madang senti lir.

⁵Kechiyong akhidang temeshi tetsürtemia Tsüngrem dak imla-a parnok kinungpurtem kübok lia, parnok pei sasa mera ketdaktsü.

⁶ Aji oda Sarai Abraham dang kibur ta ja-a tashi anga, yamaji nenokia tetsübu kecha makai kechi shitak aji inyakra, nenok la jalatem lir.

⁷ Yamajisa kinungpurtem, nenok kinungtsürtem nenok dang nungi tashi maitba taküm aser külem Tsüngrem taochi senmang amangertem ta meteta nenok sarasadem menokdangtsü asoshi tebilemdang ka-a nenoki pei kinungtsürtem dang akhümtsübua parnok den liang.

⁸Tatemsa, nenok ajak temulung ka, aria bilemtep, adianu ama meimtepba temulung tanük aser ajemalu mulungsentsü sang.

⁹Tamajung melen tamajung magütsüi, aser tatalaba melen matalai, temoatsü ang moajang; kechiyong temoatsü senmang amangtsü-ang nenok aja.

¹⁰ Kechiaser “Shibai taküm meimer, aser anogo tajung ngunür, tamajung nungi pai pei temeli sotang, aser tiyazü jembiba anenang.

¹¹Pai tamajung nungi meyipang aser tajung inyakang; pai tesünep bushia aji arishia odakjang.

¹²Kechiyong Kibuba tenük temeshipur madak lir, aser parnok sarasademba angatsü pa tenarong tendaka lir; saka Kibuba tejak tamajung inyakertem anema lir.”

¹³Tang nenoki tajung inyaktsü jangra-a lira, shibai nenok dang tamajung inyaktsü?

¹⁴ Saka temeshiba asoshi nenok timatemtsü lira nenok tepelatsü! Nisungtem tetsübuma, aser nenok shisa tebuluma.

¹⁵Saka Khrista Kibuba ta nenok mulung nung meshiteta yuang aser nenok temulung nung aliba teimla indang nisung shibai asüngdanger, pa dang nenok pei meten langzütsü teti renema liang. Saka ajemaluba aser akhümtsübuba agi aji inyakang.

¹⁶Shiri Khrista dak nenok jakla tajung atalar, nenok kechi indang nung atalar, iba indang nung parnok maksüdaktsütsü asoshi nenok mulungsentsü tajung liang.

¹⁷Kechiyong nenok timtem angutsü Tsüngremi, mulungra, tamajung inyaka timtem angu dang nungibo mapa tajung inyaka timatem tajungba.

¹⁸Kechiyong Tsüngrem dangi asenok anir arutettsü asoshi, memeshibatem atema Temeshibai oda Khristai temenentem atema teti asoshi khen asü. Pa shi nung südaktsü, saka tanela nung taküm kümdaktsü.

¹⁹Tanela nung oa pai ano tepuokdak aliba tanelatem danga sayutsüngi.

²⁰ Parnokji alemli Noa anogo nung rong yangluba mapang nungi Tsüngremi aremzüka ata-a alidang parnoki tashi manga, iba rong nungji, nisung ishika, oda nisung ti, tzü nungi kümzük.

²¹Aji mesüka baptiba agi, shi ar aketba endokba agi masü, saka Tsüngrem tsütsü mulungsentsü tajung nung mepishiba agi, Yisu Khrista shia aruba ajanga tang nenok kümzüker.

²²Pa kotaki tua kotak tenyartem aser bangdaktem aser aintem pa kübok kümdaktsür külen pa Tsüngrem tajichilen lir.