Read njo 1 PETER 4 Bible Online

1 PETER 4 - njo bible

1 PETER 4

¹Anungji Khrista shi nung timatem nungji nenok nisung azüabungba ama shi nung nenok mapang tanüngbaji joko malitsü, saka Tsüngremi mulungba ama alitsü asoshi, nenok pei sasa tebilemba kasasa agi sobuang.

²Kechiaser shibai shi nung timtemogo, pai temenen nungi anenogo.

³Kechiyong jabujariba, azüabungba, yi ajemba, salepsariba, chidiyungdi aser tesempatsü süngyanglu külemba item ajak nung nenoki jaja-a Bendangertemi jangraba koba mapang süiogo, aji teperi südakjang.

⁴Iba indangji nenoki parnok den onsara jabujariba kasasa nung mejaja nung parnoki süngmanga nenok asoshi tamajung jembir.

⁵Saka shibai akümlirtem aser asürtem anaprongla o bendangtsü renema lir, pa nem parnoki tezüngdangba agütsütsü.

⁶Kechiyong shi nung nisungtem ama o bendangba amato item tasürtem anema o bendangaka, parnoka tanela nungbo Tsüngrem taküm aliba ama taküm lidaktsütsü asoshi parnok danga osang tajungji sayutsüngia liasü.

⁷Saka kechisarena tatem anasai aitdagi; anungji nenok sarasadem asoshi temulung shitak aser teshisadang liang.

⁸ Idakji chia nenok kati ka asoshi temeimji tamakok maludaktsüi akanga sota yuang, kechiaser temeimi temenen jenti nembanger.

⁹Kati ka dang menemnemi aener dang ajungba ama jungtepang.

¹⁰Tsüngremer taochi tapu balala ketdangsürtem tajung ama nenok shiai sempet kaka agizüka alibaji kati ka asoshi amshiang.

¹¹Kechisarena nung Yisu Khrista ajanga Tsüngrem sentsüwangshidaktsütsü asoshi kari o jembira, pai Tsüngrem otem ama jembiang; kari tenzükra, Tsüngremi agütsüba tashi ama inyakang; kechiyong Yisu Khrista meyong sentsüwangshi aser bangdak teti tatem makai lir. Amen.

¹²Temeimbatem nenok atitangtsü asoshi nenok rongnung kechi tetendangba mi ama arur, aji tama-ataloktsü ka ataloker ta nenoki tesüngmang.

¹³Saka kodaka nenok Khrista timtem lemsatepertem lir, patakaji pa sentsüwangshi jungkai adokdang nenoki pelatsü alinungji nenok pelatepang.

¹⁴Khrista tenüng atema nenok atalara, nenok tepelatsü, kechiaser sentsüwangshi aser Tsüngrem Tanela nenok madak lir.

¹⁵Saka nenok rongnung shingaia nisung tepseter mesüra auür mesüra tamajung inyaker mesüra tangar nisung mapa nung jangjongmarar ama timtetem.

¹⁶Saka Khristan ka ama nisung kati timtemra, pai akseta teküm ma, saka iba tenüng nung pai Tsüngrem sentsü wangshidakjang.

¹⁷Kechiyong Tsüngremer kibong nungi ang tenzüka o bendangtsü asoshi mapangji tonga arua lir, aser ibaji asenok dak nungi tenzükra, ajangla Tsüngremer osangtajung dang tashi mangartem tatembang tiaji kechi asütsü?

¹⁸ Aser temeshipur-a anarongtenakang kümzükra, ajangla Tsüngrem metsübur aser temenenpurtem kechi akümtsü?

¹⁹Anungji shirnoki Tsüngremi mulungba ama timatemer, parnoki tajung inyakba nung teyanglur temulung lemtetba nem pei taküm bendanga agüjang.