Read njo 1 PETER 5 Bible Online

1 PETER 5 - njo bible

1 PETER 5

¹Anungji tamburtem, nia külemi tambur ka aser Khrista timtembatem kulisür ka, aser tarutsü jungkai adoktsüba sentsüwangshi lemsateper ka, ni nenok rongnung ajungshir,

²nenok nem nungloktsüba Tsüngremer san telok kechi lir aji mesüang, khanga masü, saka mulungsoa. Tsüngremi mulungba ama mesüra tajangzük asoshi masü, saka jangrabangra-a,

³mesüra nenok dang melaba madakji kibur mekümi saka nenok pei sasa telok dangji tatishitsü kümang.

⁴Aser kodang Sannüker tongtibaji jungkai adoktsü, nenoki rema maoba sentsüwangshi korang angutsü.

⁵ Aji odasa nenok lanurtemi tamburtem kübok liang. Nenok ajaki kati ka tenzüktsü ajemalua kümang. Kechiaser, “Tsüngremi asükümer noktanger saka ajemalur nem taochi agütsür.”

⁶Anungji Tsüngremer mapang tetemsü nung nenok uludaktsütsü asoshi nenoki nenok sasa pa tashi taitba teka kübok ajemalua kümang.

⁷Nenok shisa buluba ajak pa dak yuang, kechiaser pai nenok asoshi anebalur.

⁸Teshisadang liang, saksalema liang! Arüa aliba molusongzü ama nenok anemer mojingi shiba meyoktettsü pa bushia senzüdagi.

⁹Alima nung aliba nenok adianu dak item timtem kasa ataloker ta meteta nenoki nenok tamang nung akanga noktakang.

¹⁰Aser taochi ajak Tsüngrem, shibai pei teti tatem maka sentsüwangshi dangi Khrista nung nenok aja, nenoki kenpiga timtemer külen pai pei sasa nenok abensadaktsütsü, akangdaktsütsü aser tashi itdaktsütsü.

¹¹Pa dang teti tatem makai bangdak sang! Amen.

¹² Silvana, adianu shiba dak ni temulung lemteter, pa teyari agia o tatsü nung ni nenok ajungshitsü aser ya ajak ochiba Tsüngremer taochi ta kuli asütsü züluogo. Nenoki iba nungji akang akanga noktakang.

¹³ Nenok den külemi shimtetba Babilon[2] nung aliba arogoi, aser kü chir Marki nenok nem salem agütsür.

¹⁴Temeshi temeimtep agi kati ka den salem agütsütepang. Khrista nung aliba nenok ajak dangi taochi sang.