Read njo 2 PETER 2 Bible Online

2 PETER 2 - njo bible

2 PETER 2

¹Saka nüburtem rongnung tiyazü ainketertem adoka liasü, ano yamaji nenok rongnunga tiyazü tesayurtem adoktsü. Parnoki miima teraksatsü tiyazü tesayubatem bener arutsü; Kibuba shibai parnok alizük pa dang menangzüktsü aser pei sasa madak yakta teraksa bener arutsü.

²Aser aikati parnok jabujariba sülen anitaktsü aser parnok atema ochi lenmangji ataladaktsütsü.

³Aser ambangyim nung parnoki tiyazü otem agi nenok nungi pei tajangzük bushitsü. Aji asünung, parnok taitsüba alemli nungi renema lir. Aser parnok teraksatsüba amua moi lir.

⁴Kechiyong Tsüngremi kotak tenyartema parnoki temenen mena nung parnok mapayui parnok molumi nung nungoktsü, aser o bendangba anogo tonga ayutsüsa ongken tammang nung parnok puok;

⁵akhi tejen limaji mapayui Tsüngrem metsübubatem madak tzümetsüng arudaktsü, saka Noa, shibai temeshiba indang sayu, pa den nisung tenet kümzük.

⁶Tsüngremi Sodom aser Gomora yimtitem aut küma odakja aitsü aser Tsüngrem metsüburtem asoshi ya tansütsü ka kümdaktsü.

⁷Saka pai ochishir Lot kümzük, kechiyong tamajungba purtem jabujariba pai sempa.

⁸Kechiyong iba ochishir nisung parnok den anogo shia ali nung, ozüng nung maliba mapa tamajungtem inyakba parnok yimya pai ngua aser angashia item jagi pa kanga jashidaktsü.

⁹Temeshipur tatitang nungi kümzüktsü aser ochi mashiba purtem merenshitsü asoshi o bendangba anogo tashi yua atatsü koda Kibubai meteta lir.

¹⁰Aser talisa shiri memeshiba shi azüabungba sülen anitak aser yimsüsüba bangdaktem mezüngmeshi asü; item tesayurtemji tasü tait aser tekong temerang, aser temaba nung tamaren sentsüwangshibatemji metsübui mezüngmeshiang asür.

¹¹Aji oda kotak tenyartem parnok dang nungi tashi taitba aser ain taoba saka, parnoki Kibuba madang parnok anema tatalaba o bendang bener marur.

¹²Saka itempur, shisa makaba tesembatsü asoshi asoba shirurutem ama, parnoki memetet nung anema noktaker, kasa teraksatsüba nung parnok raksatsü.

¹³Parnoki timtem adokdaktsüba ama parnok timtemdaktsütsü. Anüngdang shi temang jangratem sünembaji parnoki tepela ta züngshir, nenok den benjong chiyung dang parnok pungmen aser tarak lir aser parnok tekülak nung pelateper.

¹⁴Parnok tenük nüktapangta agi sünga lir. Parnoki temenen nungi anentsü makok. Parnoki temulung mesüngjemba purtem mesüzüka aor, parnok mulungjangtem tenükshiba nung yimya süba-a lir; parnok atakatemba chirtem lir.

¹⁵Parnoki shitakba lenmang toktsür mashileni ao. Tai inyakba ajanga tajangzük meimba Beor chir Balam lenmangi parnoki anitak.

¹⁶O mejembiba gado kati nisung ola agi jembia ainkar tamashiji nemtem.

¹⁷Item tzü maitba tzüpokdaktem aser yipru mopung agi ona aoba mepet lir; parnok asoshi teptepa ammang yuja lir.

¹⁸Kechiyong parnoki mezümeküma amajok o jembia tai nung alirtem rongnungi jenteta arudi ta alirtem dang jabujari agi shi azüabungbatem agi mesüzüka anir.

¹⁹Parnoki parnok dang nüjiba nangzüker, saka parnok pei sasa teraksa lar lir; kechiyong kechi agi nisung ka akoker, iba lar pa akümer.

²⁰Kechiyong Kibuba asen Kümtetdakba Yisu Khrista temetetba ajanga alima memerükba nungi jenbua arur külen iba sang nungsa tanaben pua kokdaktsüra, ajangla parnok tatembang tiaji mezüng tia dang nungi tamajungba.

²¹Parnoki temeshiba lenmang kodanga memetet tajungba süla, kechiaser aji meteta yur, parnok nem agütsüba temeshi ozüng nungi meyipbaji tamajungba.

²² Chichiba apijemtsü shin ama parnok daka atalok, oda, “Azüi pei saktsüdagi meyipa shilanger, aser ak-i tzü chigur lishi mezütsü meyipa aor.”