Read njo 2 PETER 3 Bible Online

2 PETER 3 - njo bible

2 PETER 3

¹Temeimbatem, tang ni nenok dangi züluba ya tanabuba shiti lir.

²Aser item anaprongla nungji temeshi ainkartemi akhidang jembiba otem aser nenok tenyartem ajanga jembiba Kümtetdakba Kibuba ozüng nenoki bilemtettsü asoshi ni nenok nem bilemtetdakja, nenok tasüngtet temulung ajungmesor.

³ Tatem anogo nung tatalartemi atala-a arutsü ta nenoki tamasa metetang. Parnok pei azüabungba nung jajatsü.

⁴Aser ashitsü, “Pa tanaben arutsü tenangzükba kong ali? Kechiaser asen tsüraburtem süogo; saka tetenzük nung alima yangludang komama liasü, yamaji dang maneni tanü tashi kechisarena arudagi.”

⁵Kechiyong alemli nungi anüngtem aser tzü nungi aser tzü ajanga yangluba alima Tsüngrem o agi liasü; aji parnoki asa-a dang mezüngshir.

⁶ Iba tzü jagi alemli tejen lima metsüngbanga samatsü.

⁷Saka memeshiba nisungtem o bendangtsü aser tesamatsü anogo matong tashi iba o kasa agi tang aliba anüngtem aser alima mi asoshi rizünga lir.

⁸ Saka temeimbatem, Kibuba tsüngdang anogo kaji küm meyi ka ama, aser küm meyi kaji anogo ka ama lir; iba o ya nenoki mezüngmeshi tesüma.

⁹Kari menur ama bilemaka Kibubai pei tenangzükba indang memenur; saka shinga mesamadaktsünür saka ajak temulung meyipba dangi arudaktsünüa nenok tsütsü pai talangka aremzüker.

¹⁰ Saka auür ka ama Kibuba anogo arutsü, iba anogo nung anüngtem ola tulu adoka aenshia aotsü aser anüng nung alibatem mi agi yimsa-a aotsü aser alima aser idakji aliba ajak rongtoktsü.

¹¹Yamaji item ajak teyimsatsü lir ta meteta, nenok kechi ama asütsü? Nenok temeshiba aser Tsüngrem mesükba nung lia,

¹²Kibuba Anogoji asoshi yongya-a liang, koba anogo nung anüngtem aser yangji alibatem rongsatsü aser mi agi yimsa-a aotsü.

¹³ Saka pai nangzükba amato anüngtem tasen aser alima tasen kechi nung temeshipurtem alir, aji asoshi asenoki ata-a alir.

¹⁴Anungji temeimbatem, nenoki item ajak atar asünung, nenok pa nükdang pungmen aser tai makai tesünep nung nenok ngudaktsütsü asoshi jangra-ang.

¹⁵Aser asen Kibubai talangka aremzükbaji nenok tekümtet asoshi ta züngshiang, aji asen temeimba adianu Paulia pa nem agütsüba shisa amato, nenok dangi züluogo.

¹⁶Item indang jembia pai pa shiti ajak nung zülu. Item nung o kar karbo tangatettsü tasak lir. Aser memeteter aser temulung matangba purtemi pei samatsüa kechi koda Lai tangajia parnoki meyipshidakja mesensatsür, yamaji parnoki itemia meyipshidakja mesensatsür.

¹⁷Anungji temeimbatem, nenoki itemji anojungi meteta tamajung purtem tiyazü o agi ania oa nenok pei noktakdak nungi metsüktsü asoshi kümdangang.

¹⁸Saka asen Kibuba aser Kümtetdakba Yisu Khrista taochi aser temetetba nung inang, Tang aser teti tatem makai pa dang sentsüwangshi sang. Amen.