Read njo 1 YOHAN 1 Bible Online

1 YOHAN 1 - njo bible

1 YOHAN 1

¹ Tetenzük nungi kechi liasü onoki kechi angashi, kechi onok tenük agi angu, kechi onoki reprang, aser onok teka agi kongshia metet, oda taküm o indang.

² Aser takümji jungkai adok, onoki aji angu aser iba indang kuli asür, aser taküm koba Tebu den liasü aser onok dangi jungkai adok, iba teti tatem makaba taküm indang onoki nenok dang sangoktsür.

³Onok den nenoka telungjem akatsü asoshi kechi onoki angu aser angashi, aji nenok danga sangoktsür, aser onok telungjemji Tebu aser Pa Chir Yisu Khrista den lir.

⁴Aser onok tepela peria akümtsü asoshi onoki o itemi zülur.

⁵Tsüngremji tesangwa lir, aser pa dak tammang meshimeshia mali ta onoki kechi osang pa nungi angashi aser nenok dang sangoktsür ibaji ya lir.

⁶Asenok pa den telungjem kar ta asenoki shira aser ano asenoki ammang nung jajara, ajangla asenoki yazür aser ochibaji asenoki meinyaker.

⁷Saka pa tesangwa nung aliba amaji asenokia tesangwa nung jajara, asenok kati ka den telungjem kar, aser pa Chir Yisu zü agi asenok temenen ajak nungi merükdaktsür.

⁸Asenok dak temenen mali ta asenoki shira, asenoki pei sasa külakoktsür aser ochibaji asenok dak mali.

⁹Asenoki asen temenen nangzükra, asenok dang temenentem adoktsü aser memeshiba ajak nungi asenok merükdaktsütsü, pa temulung lemtetba aser ochi lir.

¹⁰Anungji asenoki temenen mebenshi ta shira, asenoki pa tiyazür ka kümdaktsür aser pa o ji asen dak mali.