Read njo 1 YOHAN 2 Bible Online

1 YOHAN 2 - njo bible

1 YOHAN 2

¹Tebusangtem, nenoki temenen mebenshitsü asoshi item o ni nenok dangi zülur. Saka oda nisung kari temenen menara, Tebu den aser Teyarir ka, oda Temeshiba Yisu Khrista lir;

²aser pa asen temenentem asoshi tekümtet tenla lir aser asen asoshi dang masü, saka alima ajonga temenentem asoshi lir.

³Asenoki pa temelaba ozüngtem benshira, aji agi asenoki pa meteta lir ta jangjatsür.

⁴“Ni pa metet” ta shibai ashir, saka pa ozüngtem mebenshir, paji tiyazür ka lir aser ochibaji pa dak mali.

⁵Saka shibai pa o anga-a benshir, pa dak atangji Tsüngrem temeim abensaogo. Pa dak asenok lir ta aji agi asenoki metet.

⁶Ni pa dak lir, ta shibai ashir, pai koda jajar, paia aji oda jajatsü tim.

⁷ Temeimbatem, ni nenok dangi ozüng tasen ka mezülur, saka tetenzük nungi koba ozüng nenok kar, iba tejen ozüng zülur. Nenoki kechi o angashi, aji iba tejen ozüngji lir.

⁸Ano ozüng tasenba, koba pa dak aser nenok dak ochi lir, aji ni nenok dangi zülur, kechiyong tammangji süia odagi aser tang atangji ochiba tesangwaji yadagi.

⁹Shibai ni tesangwa nung lir ta ashir, aser pei adianu sempar, pa tang tonga ammang nung lir.

¹⁰Shibai pei adianu meimer, pai tesangwa nung alir, aser pa dak temetsüdaktsü kecha mali.

¹¹Saka shibai pei adianu sempar, pa ammang nung lir, aser ammang nung jajar, aser pai koleni aor aji memetet, kechiaser ammangi pa nük pokdaktsüogo.

¹²Tebusangtem, pa tenüng atema nenok temenentem atok nung ni nenok dangi zülur.

¹³Obalatem, shiba tetenzük nungi liasü, nenoki pa metet nung ni nenok dangi zülur. Asangurtem, nenoki tamajungba akok nung ni nenok dangi zülur.

¹⁴Tanurtem, nenoki Tebu metet nung ni nenok dangi züluogo. Obalatem, shiba tetenzük nungi liasü, nenoki pa metet nung ni nenok dang zülur. Asangurtem nenok tashi tait lir, aser Tsüngrem O nenok dak alir, aser nenoki tamajungba akok nung ni nenok dangi zülur.

¹⁵Nenoki alima mesüra alima nung aliba osettemji temeim, kari alima meimra Tebu temeim pa dak mali.

¹⁶Kechiyong alima shi azüabungba, tenük azüabungba, aser taküm mezümeküm, item ajak Tebu nungi masü; saka alima nungi lir.

¹⁷Aser alima aser iba azüabungba süitemdagi; saka shibai Tsüngrem mulungba benshir pa teti tatem makai alir.

¹⁸Tanurtem, tatem anogo tongogo Khrista anemer arudagi ta nenoki angashiba ama, tang joko Khrista anemertem aika adokogo; aji agi tatem mapangji tongdagi ta asenoki meteter.

¹⁹Parnok asenok rongnungi oadok, saka parnok asenok rongnung medeni liasü, kechiyong asenok den aden asübo asenok den maneni lila. Saka parnok ajak asenok den maden ta jungkai adoktsü asoshi parnok oadok.

²⁰Saka nenokbo Temeshibai mezüja shimtetogo aser nenoki ajak metet.

²¹Nenoki ochi memetet ta ni nenok dangi zülu masü, saka nenoki aji metet nung aser ochi nungi tiyazü kecha madoker; aji asünung ni zülu.

²²Yisuji Khrista lir ta shibai menangzüker, pajisa Khrista anemer.

²³Shibai Techir menangzüklir, pa Tebu maka, shibai Techir nangzüker, pa Tebu kar.

²⁴Tetenzük nungi nenoki kechi angashi, aji nenok dak lidakjang. Iba tetenzük nungi angashibaji nenok dak lira nenokia Techir aser Tebu dak alitsü.

²⁵Aser teti tatem makaba takümji pai asenok dang nangzüka lir.

²⁶Shirnoki nenok ashioktsür, parnok indang ni item o nenok dangi zülur.

²⁷Pa nungi nenoki kechi mezüja shimtetba angu, aji nenok dak ali nung, kari nenok dang sayutsüngitsü tenüngdaktsü maka. Saka pai mezüja shimtetba jagi kechisarena indang nenok dang sayu nung, aser aji tiyazü masü, ochi asünung, Tanelai sayuba angang aser Khrista den lungjema liang.

²⁸Aser tang tebusangtem, Khrista dak liang, anungji pa jungkai adokdang asenok tasü aittsü aser pa tanaben arudang pa tsüngdang asenok mak masütsü.

²⁹Pa temeshi lir ta nenoki metetra, ajangla shibaisa temeshiba benshir, pa-a pa nungi asoba lir.