Read njo 1 YOHAN 3 Bible Online

1 YOHAN 3 - njo bible

1 YOHAN 3

¹Asenok Tsüngrem chirtem ta ajatsü asoshi Tebui komama temeim asenok nem agütsü, yamaji asenok atangji Tsüngrem chirtem lir. Aji asünung alimai asenok memetet kechiaser alimai pa memetet.

²Temeimbatem, tang asenok Tsüngrem chirtem lir, aser tesü asenok kechi asütsü aji ano jungkai madok. Pa jungkai adokdang asenok pa ama asütsü; kechiaser pa komama lir, aji oda asenoki pa angutsü; aji asenoki metet.

³Aser pa dak shibai yamaji imlar, pa komama temerük, pa-a aji oda pei sasa merükteter.

⁴Shibai temenen menar pai ano ozüng raksar, temenenji ozüng raksaba lir.

⁵ Aser temenen agientsü pa jungkai adok ta nenoki metet; aser pa dak temenen mali.

⁶Shibasa Khrista dak alir, pai temenen maneni mebenshir, shibai temenen maneni benshir pai pa mangu mesüra paji memetet.

⁷Tebusangtem, shinga nema nenok tanishidaktsü; shibai temeshiba benshir paji ochi lir;

⁸shibai temenen benshir paji mojing meyong lir. Mojing mapatemji raksatsütsü asoshi Tsüngrem Chir jungkai adokdaktsü.

⁹Shiba Tsüngrem nungi soa lir, pai temenen mebenshir, kechiaser Tsüngrem nungi pa aso.

¹⁰Idaki Tsüngrem chirtem aser mojing chirtem jungkai adoker; shibai temeshiba meinyaker, mesüra shibai pei adianu memeimer pa Tsüngrem meyong masü.

¹¹ Kechiyong asenoki kati ka den meimteptsüla ta, nenoki tetenzük nungi angashiba osangji aji lir.

¹² Kain koda tamajungba nungi liasü, aser pai pei tenu tepset, yamaji asenok masütsüla, kechiba Kaini pa tenu tepset? Kechiaser pa mapatem majung liasü, saka tenu mapatem temeshi liasü.

¹³Adianutem, alimai asenok sempara, tesüngmang.

¹⁴ Asenok tasüba nungi taküm daki ogo ta asenoki metet; kechiaser asenoki adianutem meimer. Shibai memeimer pa tasüba nung alir.

¹⁵Shibaisa pei adianu sempar, pa nisung tepseter; aser nisung tepseter shinga daka teti taküm malir ta nenoki metet.

¹⁶Asenok asoshi pai pei taküm yutsü nungji asenoki temeim metet; aser asenoki adianutem asoshi pei taküm yutsütsü tim.

¹⁷Saka nisung kar alima oset kar, aser pei adianu tenüngdaktsü ngua pa nungi pei aria bilemba mulungjang sota yura, Tsüngrem temeim koda pa dak alir?

¹⁸Kü tebusangtem, asenoki o mesüra temeli agi masü, saka mapa aser ochi agi meimtepdi.

¹⁹Aji agi asenok ochi meyong lir ta asenoki metettsü, aser kodangsa asen temulungjangi asenok aitsüdir asenoki pa madang asen temulungjang nung tanaben meteta kümdaktsütsü;

²⁰kechiaser Tsüngrem asen temulung dang nungi tuluba, aser pai ajak metet.

²¹Temeimbatem, asen temulungjangi asenok maitsüra, Tsüngrem madang asen mulung lemteta lir.

²²Aser asenoki kechisa meshidir, aji asenoki pa nungi angur, kechiaser asenoki pa ozüngtem benshir, aser pa nükdang kechi tajung aji inyaker.

²³ Pai asenok dang melaba ozüng amato asenoki pa Chir Yisu Khrista tenüng nung amangtsü aser kati ka den meimteptsü aji asen nem agütsüba temelaba ozüng lir.

²⁴Aser shirnokisa pa temelaba ozüngtem benshir, parnoka pa dak alir, aser pa parnok dak alir, ta pai asenok nem agütsüba Tanela agi asenoki metet.