Read njo 1 YOHAN 4 Bible Online

1 YOHAN 4 - njo bible

1 YOHAN 4

¹Temeimbatem, nenoki tanela shia dak tamang, saka tanelatem Tsüngrem nungi asü masü parnok tendangang; kechiaser tiyazü ainkar jenti alima nung adokogo.

²Nenoki Tsüngrem tanela ya agi meteter; Yisu Khrista shi nung aru ta aji tanela kobaisa nangzüker ibala Tanela ajak Tsüngrem nungi lir.

³Saka tanela kobaisa Yisu menangzüker, ibala tanela Tsüngrem nungi masü, saka aji Khrista anemer tanela, koba arudagi ta nenoki angashiogo. Aser aji tang alima nung lir.

⁴Kü chirtem, nenokbo Tsüngrem nungi lir, aser nenoki parnok kokogo, kechiaser alima nung aliba dak nungi nenok dak alibaji tuluba.

⁵Parnok ali nunger, anungji parnoki alima o jembir, aser alimai parnok o angar.

⁶Saka asenokbo Tsüngrem nungi lir, shibai Tsüngrem metet pai asenok o angar, shiba Tsüngrem nungi masü pai asen o mangar. Ya agi asenoki ochi Tanela nungi tiyazü tanela bendanga meteter.

⁷Temeimbatem, asenoki kati ka den meimtepdi; kechiaser temeim Tsüngrem nungi lir. Aser shibai meimer pa Tsüngrem nungi asoba aser pai Tsüngrem metet.

⁸Shibai memeimer pai Tsüngrem memetet; kechiaser Tsüngrem temeim lir.

⁹Tsüngrem ajaso Chir ajanga asenok taküm alitsü asoshi, Tsüngremi pa alimai yok, idaki asenok dang Tsüngrem temeim jungkai adok.

¹⁰Asenoki Tsüngrem dang meim masü, saka pai ang asenok dang meim, aser asen temenen atema tekümtet tenla pai pei Chir yok, idaki temeim lir.

¹¹Temeimbatem, Tsüngremi asenok dang yamai meim süra, ajangla asenokia kati ka den meimteptsü tim.

¹² Nisung shingaia Tsüngrem kechasüdanga munguka. Saka asenoki kati ka den meimtepra, Tsüngrem asenok dak alir aser pa temeim asenok dak tabensa akümer.

¹³Aser alima Kümtetdakba akümtsü Tebui Techir yok aji onoki angu aser kuli agütsür.

¹⁴Pa asenok dak alir asenok pa dak alir, aji pai asenok nem agütsüba Tanela agi asenoki meteter.

¹⁵Yisuji Tsüngrem Chir lir ta shibai nangzükdir, Tsüngrem pa dak lir aser pa Tsüngrem dak lir.

¹⁶Aser asenok atema Tsüngrem temeim koba aka, aji onoki metet aser amanger.

¹⁷Aser Tsüngrem pa dak alir. O bendangnü asenok temulung lemteta litettsü idaki asenok dak temeim tabensa kümdaktsür, kechiaser pa komama lir, asenoka iba lima nung yamaji lir.

¹⁸Temeim nung tetsübu mali, saka tabensa temeimi tetsübu aridoker, aser shibai tsübur pa temeim nung tabensa maküm.

¹⁹Pai tamasa asenok meim nung asenoki pa meimer.

²⁰Nisung kati, ni Tsüngrem meimer ta shira, aser pei adianu sempara, pa tiyazür, kechiyong koba adianu pai angu pa dang pai memeimra, ajangla Tsüngrem shiba pai mangur, pa dang memeimtet.

²¹Shibai Tsüngrem meimer, pai pei adianu meimtsüla, ibala ozüng onoki pa nungi angu.