Read njo 1 YOHAN 5 Bible Online

1 YOHAN 5 - njo bible

1 YOHAN 5

¹Yisuji Khrista, ta shibai amangdir pa Tsüngrem nungi aso, aser shibai tsürabur dang meimer pai Techir danga meimer.

²Aser asenoki kodang Tsüngrem dang meimer aser pa ozüngtem benshir, asenoki Tsüngrem chirtem dang meimer ta asenoki metet.

³ Kechiyong asenoki pa ozüngtem benshitsü, ya Tsüngrem temeim lir aser pa ozüngtem taret masü.

⁴Kechiaser shibasa Tsüngrem nungi aso, pai alima akoker aser takokba kobai alima ajeter ibaji asen tamang.

⁵Yisuji Tsüngrem Chir ta shibai amanger pa alema alima akokba shiba lir?

⁶Tzü aser azü agi arubaji pa, oda Yisu Khrista ang; Tzü agi dang masü saka tzü aser azü agi.

⁷Aser kuli agütsübaji Tanela lir, kechiyong Tanelaji ochi lir.

⁸Kechiyong Tanela, tzü aser azü item asempronglai kuli agütsür aser item asempronglaji ka dang lir.

⁹Asenoki nisungtem kuli agizüker süra, ajangla Tsüngrem kuli iba dang taoba, kechiaser pai pei Chir indang kuli agütsü ta, ya Tsüngrem kuli lir.

¹⁰Shibai Tsüngrem Chir dak amanger, pa dak iba kuli lir. Shibai Tsüngrem Chir dak mamanger, pai pa tiyazür kümdaktsüogo; kechiaser kechi kuli Tsüngremi pei Chir indang agütsüogo, aji pai mamang.

¹¹ Aser Tsüngremi asenok nem teti taküm agütsü aser iba taküm pa Chir dak lir, iba kuliji ya lir.

¹²Shiba Techir aka, pa taküm kar; shiba Tsüngrem Chir maka pa taküm maka.

¹³Tsüngrem Chir tenüng nung amangba nenok teti tatem maka taküm kar, aji nenoki metettsü asoshi nenok dangi ni ibai zülu.

¹⁴Asenoki pai mulungba amato langka meshira, pai asenok dang angar, ya pa tsütsü asenoki anguba temulung lemtetba lir.

¹⁵Aser asenoki kechisa meshidir, aji pai angar ta asenoki metetra, ajangla pa dang kechisa meshi item nguogo ta asenoki metet.

¹⁶Kari pei adianu tasütsüsa mesüi temenen benshiba ngura pai mepishitsü, aser tasütsüsa mesüi temenen benshirtem asoshi Tsüngremi pa nem taküm agütsütsü. Tasütsüsa temenen ka lir, aji indang pai memepishitsüla ta ni ashir.

¹⁷Ochi mashiba ajakji temenen lir, saka tasütsüsa masüba temenen ka lir,

¹⁸shibasa Tsüngrem nungi aso, pai temenen maneni mebenshir, saka Tsüngrem nungi asobai pei sasa sota ayur aser tamajungbai pa dak mekongshir ta asenoki metet.

¹⁹Asenok Tsüngrem nungi lir, aser alima ajonga tamajungba ain kübok lir ta asenoki metet.

²⁰Aser Tsüngrem Chir aruogo aser kechi agi asenoki iba ochiba indang metet, ibala tangatetba asenok nem agütsü aser asenoki iba ochiba dak, oda pa Chir Yisu Khrista dak lir ta asenoki metet. Ibai ochi Tsüngrem aser teti tatem makaba taküm.

²¹Temeimba chirtem, süngyanglutem nungi nenok sasa pila-a liang!