Read njo OBENDANGERTEM 1 Bible Online

OBENDANGERTEM 1 - njo bible

OBENDANGERTEM 1

¹Yihusua sür külen Israel nüburtemi KIBUBA dang asüngdang, “Kanan nunger den raratsü asoshi onok rongnung shiba tama atutsü?”

²KIBUBAi langzü, “Yihuda atutsü, kechiaser alinükji ni pa ket nung agütsüogo.”

³Idangji Yihudai pa adianu Simeon dang ashi, “Kü nem lemzüktsüba litsüi kü den atung, aser asenoki Kanan nunger anema raradi. Onoki ne nem lemzüktsübai ne den aotsü.” Anungji Simon pa den ao.

⁴Kodang Yihuda atu, KIBUBAi Kanan aser Periz nunger parnok ket nung agütsü, aser parnoki Bezek nung meyi ter akok.

⁵Idakji parnoki Adonibezek angu, aser pa anema rara; aser Kanan aser Periz nungertem akok.

⁶Saka Adonibezek jena ao, aser parnoki aria oa pa pur pa jemtsüba aser tetsüng kemtsüba leptoktsü.

⁷Idangji Adonibezeki ashi, “Chuba neter parnok jemtsüba aser kemtsübatem leptoker kü langbang kübok endokba shima liasü; ni inyakba ama tang Tsüngremi kü dang inyakogo.” Aser parnoki pa Yirusalemi bener aru, aser pa yangji asü.

⁸Yihuda nisungtemi Yirusalem anema rara aser aji agi. Parnoki yimtiji nok agi raksatsü aser idakji mi senoktsü.

⁹Iba sülen nisungtemi tenem linük, Negeb, aser anüolen ali lenten nung alir Kanan nunger den raratsü ao.

¹⁰Parnoki Hebron koba dang Kiriath Arba ta ajar iba tashiji oa Kanan nunger anema alu aser Sheshai, Ahiman aser Talmai akok.

¹¹Idak nungjagi parnoki Debir nung alir anema ao. Akhidangbo Debir tenüngji Kiriath Sefer liasü.

¹²Aser Kalebi ashi, “Shibai Kiriath Sefer kokdir aser agidir, ni kü jala Aksa kibutsü asütsü pa nem agütsütsü.”

¹³Kaleb tenu, Kenaz jabaso Othnieli aji agi; aser pai pa nem par jala Aksa pa kibutsü asütsü agütsü.

¹⁴Kodang la pa dangi aru, lai pa dang la tebu dang alu ka asüngdangtsü ajongshi, aser lai la Gado nungi alu, aser Kalebi la dang ashi, “Nai kechi aginür?”

¹⁵Lai pa dang ashi, “Kü nem sempet ka kua; nai ni Negeb lima nung toktsü nungji, kü nem tzübutema kua.” Aser Kalebi la nem tzübu temaba aser teküboklen aliba tzübu agütsü.

¹⁶Mosa toko, Ken nunger chirtem Negeb anasa aliba asangdong yimti nungi Yihuda chirtem den tua Yihuda lisem limai oa nüburtem den ali.

¹⁷Idangji Yihudai pei adianu Simeon den ao, aser Kanan nunger Zefat nung alirtem khenyongi samatsü. Anungji iba yimti tenüng Horma[1] aja.

¹⁸Yihudai ano Gaza, Ashkelon aser Ekron aser item litsü dena agi.

¹⁹Aser KIBUBA Yihuda den liasü, aser pai tenem lima agi saka pai lenten alirtem maridoktet, kechiaser parnok merang talungtsü liasü.

²⁰Aser Mosai ashiba ama, Kaleb nem Hebron agütsü; aser iba nungi pai Anak jabaso asem aridok.

²¹ Saka Benjamin nungeri Yirusalem nung alir Yebus nunger maridok; anungji tanü tashi Yirusalem nung Benjamin nunger den Yebus nunger alir.

²²Yosef kidonga Bethel anema atu, aser KIBUBA parnok den liasü.

²³Aser Yosef kidongi Bethel ladangtsü yok. Tang yimti tenüngji akhidangbo Luz liasü.

²⁴Aser ladangertemi yimti nungi nisung ka adoka angu, aser parnoki pa dang ashi, “Yimlibilema yimti-i ailen lenmang onok dang sayuangma, aser onoki ne dang meima benshitsü.”

²⁵Aser pai parnok dang yimti lenmangji sayu; aser parnoki yimtiji nok agi lepreptsü, saka parnoki nisungbaji aser par kinunger ajak odaktsü.

²⁶Nisungbaji Het nunger limai ao aser yimti ka yanglu, aser iba tenüng Luz aja; tanü tashi iba tenüngji lir.

²⁷ Saka Manase-i Beth Shean nisungtem mesüra Taanak mesüra Dor mesüra Ibleam mesüra Megiddo aser iba temeket nung alirtem maridok, kechiaser Kanan nungertemi idakji maneni ali.

²⁸Kodang Israel tashi ita aküm, parnoki Kanan nungerji tashiyim agi mapa tasak inyakertem kümdaktsü, saka parnokji meshimeshiabo maridok.

²⁹Efraimi Gezer nung aliba Kanan nunger maridok; saka parnok rongnung Kanan nunger Gezer nung ali.

³⁰Zebuluni Kidron mesüra Nahalol nung alir Kanan nungertem maridok, saka parnok den lidaktsü; aser parnokji tashiyim agi mapa tasak inyakertem kümdaktsü.

³¹Asheri Ako alirtem mesüra Sidon alirtem, mesüra Ahlab alirtem mesüra Akzib alirtem, mesüra Helba alirtem, mesüra Afik alirtem, mesüra Rehob nung alirtem maridok;

³²saka linük nübur Kanan nunger den Asher nunger ali; kechiyong parnoki parnok maridok.

³³Naftali-i Beth-shemes nung alirtem mesüra Beth-anat nung alirtem maridok, saka pai Kanan nunger, iba linük alirtem, den ali; aji saka Beth-shemes o Beth-anat nung alirtem asoshi mapa tasak inyaktsüsa aküm.

³⁴Amor nungeri Dan nunger tenem limai meyipa nungnena yok, kechiaser parnoki parnok lenteni alutsü memela;

³⁵saka Amor nunger Heres tenem nung, Aijalon nung, aser Shaalbim nung maenshidang ali, saka Yosef kidong teka parnok madak akang akanga liasü, aser parnok mapa nung kangoka inyaktsüsa aküm.

³⁶Amor nunger arrtsüji Akrabbim atuba nungi, Sela nungi temalen tashi oa liasü.