Read njo OBENDANGERTEM 10 Bible Online

OBENDANGERTEM 10 - njo bible

OBENDANGERTEM 10

¹Abimelek sür külen Israel kümzüktsü asoshi Issakar kidong nungi Dodo semchir Pua chir Tola adok. Pa Efraim tenem lima Shamir nung ali.

²Pai Israel küm metsür-asem o bendang, aser asü aser Shamir nung arem.

³Pa sülen Gilead nunger Jair adok, shibai israel küm metsür-ana o bendang.

⁴Pa jabaso semer liasü, aser parnoki Gado semer nung amen. Gilead lima yimti semer nung parnoki yimsü asü, koba dang tanü tashi Havvoth-Jair ta ajar.

⁵Kodang Jair asü, pa Kamon nung arem.

⁶Tanaben Israel puri KIBUBA madang kechi majung aji inyak, aser Baal aser Ashtarot, Siria tsüngrem, Sidon tsüngrem, Moab tsüngrem, Ammon chir tsüngrem, aser Filistia nunger tsüngremtem tenzük; aser parnoki KIBUBA toktsü, aser pa metenzük.

⁷Aser Israel anema KIBUBA ain adoka pai parnok Filistia aser Ammon nungertem ket nung ayok.

⁸Pakümji parnoki Israel nunger aika kangshi, aser küm terti tashi parnoki Israel nunger Yordan anüdoklen atena or Gilead nung Amor nunger lima alir ajak kangshi.

⁹Aser Yihuda, Benjamin aser Efraim kidong anema raratsü asoshi Ammon chirtemi Yordan atena ao; aji asünung Israel kanga timtema liasü.

¹⁰Idangji Israel nüburtemi KIBUBA dang ayimtena ashi, “Onoki na anema temenen benshiogo, kechiaser onoki Tsüngrem sentokadoker Baaltem tenzük.”

¹¹KIBUBAi parnok dang langzü, “Kodang Ijip nunger, Amor nunger, Ammon, Filistia,

¹²Sidon, Amalek aser Moab nungertemi nenok kangshi, aser nenoki teyari asoshi kü dang ayimten, parnok ket nungi ni nenok mekümzük ama?

¹³Aji saka nenoki ni senzüka toktsü, aser tangar tsüngremtem tenzük, anungji ni joko nenok mekümzüktsü.

¹⁴Oang aser nenoki shimtetba tsüngremtem dang ayimtenang. Nenok timtem mapang nung parnok nem kümzükdakjang!”

¹⁵Saka Israel nüburtemi KIBUBA dang ashi, “Onoki temenen menaogo. Ne dang kechi junger ta bilemer aji onok dak inyakang, oda tang onok kümzükang ta onoki mepishir.”

¹⁶Idangji parnoki parnok rongnungi bendanger tsüngremtem endok aser KIBUBA tenzük. Aser Israel okrongba asoshi pa jashia liasü.

¹⁷Kodang Ammon nunger ajak külemi Gilead nung amen, Israel nüburtemi atenshi aser Mizpa nung amen.

¹⁸Aser Gilead nisung tongtipurtem kati ka dang ashi, “Ammon nungertem den raratsü shibai tenzükdir, Gilead alir ajak madak paji tongtiba asütsü.”