Read njo OBENDANGERTEM 11 Bible Online

OBENDANGERTEM 11 - njo bible

OBENDANGERTEM 11

¹Tang Gilead nunger Yefthaji tashi tulu temeranger ka liasü. Pa nüktapangtatsür chir ka aser pa tebu Gilead liasü.

²Aser Gilead tebutsüi pa nem jabasotem sotsü, aser kodang tebutsü chirtem tain aküm, parnoki Yeftha aridok, aser pa dang ashi, “Obalar ki nungbo na senmang mamangtsü; kechiyong na tetsür tangar chir lir.”

³Idangji pa adianutem nungi Yefthai jena ao, aser Tob lima nung ali; aser Yefthai samesa nisungtem den medem aser parnok pa den ao.

⁴Mapang tatsüka lir Ammon nungeri Israel den anem.

⁵Aser kodang Ammon nungeri Israel anema rara, Gilead tamburtemi Tob lima nungi Yeftha anir arutsü ao;

⁶parnoki Yeftha dang ashi, “Arung aser asenoki Ammon nunger anema raratsü na onok tanishir sang.”

⁷Saka Yefthai Gilead tamburtem dang ashi, “Nenoki ni mesempa no aser kübu kidang nungi ni maridok no? Kechiba nenok timtem nung alidangbo kü dangi arur?”

⁸Aser Gilead tamburtemi Yeftha dang ashi, “Iba yongjidang tang onoki ne dangi meyipa arur, onok den na aotsü aser Ammon nunger den raratsü, aser Geliad alir ajak madak na onok tekolak asütsü.”

⁹Anungji Yefthai Gilead tamburtem dang asüngdang, “Nenoki ni Ammon nunger den raratsü anir arua, aser KIBUBAi parnok kü nem agütsüra, ni nenok tekolak kümdaktsütsü ama?”

¹⁰Idangji Gilead tamburtemi Yeftha dang ashi, “Asenok tsüngda nung KIBUBA kuli asütsü; nai ashi ama atangji onoki inyaktsü.”

¹¹Anungji Gilead tamburtem den pa ao, aser nisungtemi pa parnok madak tekolak aser tanishir kümdaktsü; aser Yefthai pa o ajak Mizpa nung KIBUBA madang jembi.

¹²Yefthai Ammon nunger chuba dang osangbenertem yoka ashi, “Kü lima anema raratsü na aruba ya asenok rongnung kechi mangatetep ali?”

¹³Ammon chubai Yeftha osangbener dang yamai langzü, “Kodang Israel Ijip nungi adok parnoki kü lima Arnon nungi Yabbok tashi, aser Yordan ayong tashi agiadokogo. Anungji itemji yimjung nung meyipa agüjang.”

¹⁴Yefthai Ammon nunger chuba dangi tanaben osangbenertem yok.

¹⁵Aser pa dang ashi, “Yamai Yefthai ashir: Israeli Moab lima, mesüra Ammon nunger lima bener mao,

¹⁶saka kodang parnok Ijip nungi atu, Israeli arem ajanga Temerem Tzüyimi ao aser Kadesi aru.”

¹⁷ Idangji Israeli Edom chuba dangi osang yoka ashi, “Ner lima ajanga onok odakjang ta onoki mepishir; saka Edom chubai manga. Yamaji ano parnoki Moab chuba dangi yok, saka pai ma ta ashi. Anungji Israel kadesh nung ali.”

¹⁸ Idangji parnoki lisem lima ajanga ao, aser Edom lima aser Moab lima meketa ao, aser Moab lima anüdoklen tsütsü atong, aser Arnon külen tsütsü anen; saka parnoki Moab litsüi mai, kechiyong Arnonji Moab arrtsü liasü.

¹⁹ Idangji Israeli Amor nunger chuba Sihon aser Hesbon chuba dangi osangbenertem yok aser Israeli pa dang ashi, “Nenok lima ajanga ozü limai onok odakjang ta onoki mepishir.”

²⁰Saka Sihoni par arrtsü atendaktsütsü Israel dak tamang maka; anungji Sihoni par nübur ajak külemi sentepdaktsü, aser Yahaz nung anen aser Israel den rara.

²¹“Aser KIBUBA Israel Tsüngremi, Sihon aser par nübur ajak Israel ket nung agütsü, aser parnoki parnok akok; anungji iba linük aliba Amor nunger lima ajakji Israeli agi.

²²Aser parnoki Arnon nungi Yabbok tashi, aser arem nungi Yordan tashi Amor nunger lima ajak agi.”

²³“Anungji tang Israel Tsüngrem KIBUBAi pei nübur Israel madang Amor nunger aridok, süra nai aji aginür asü?

²⁴Nenok tsüngrem Khemoshi nenok nem kechisa agütsü aji nai magili ma? Aser KIBUBA ozü Tsüngremi shirnoksa onok jakdang aridok, itemji onoki agitsü.

²⁵ Na Moab chuba, Zippor chir Balak dang nungi tajungba asü? Pai Israel anema khenbo toktepdang asü mesüra rara asü?

²⁶Küm noklang asem Israeli Heshbon, Aroer, Arnon yimtitem aser iba temeket ajak nung ali, kechiba nai iba mapang nung itemji lepa magi?

²⁷Ni na anema tai kecha meinyak, saka nai ni anema raraba agi nai ni aibelendaktsür. KIBUBA, o bendangsangi tanü Israel nübur aser Ammon nunger tsüngda o bendangjang ma.”

²⁸Saka Yefthai osangtem yokbaji Ammon chubai manga.

²⁹Idangji KIBUBA tanela Yeftha madaki aru, aser pai Gilead, Manase aser Gilead nung Mizpa ajanga ao.

³⁰Aser Yefthai KIBUBA dang atemzüka ashi, “Nai Ammon nunger kü ket nung atangji agütsüra,

³¹ajangla ni Ammon nunger madak takok ngur meyipa arudang ozü ki kishi nungi shiba kü den ajuruteptsü adokdir, KIBUBA meyong asütsü, aser ni pa tarongba tenla asoshi agütsütsü.”

³²Anungji Yefthai Ammon nunger den raratsü ao, aser KIBUBAi pa ket nung parnok agütsü.

³³Aser pai Aroer nungi Minnith tashi yimti metsü, aser Abel Keramim tashi oa parnok jenti tepset. Yangji Ammon nungertemji Israel kübok ayu.

³⁴Kodang Yeftha pei kidangi Mizpai aru, ajiang par jala asüm bener tsüngsanga pa lenji adok. Par tanur laji dang liasü. La dak alaka pa jabaso mesüra jala mali asü.

³⁵Kodang pai la angu, pai pei süoshi shisa aser ashi, “Aiatai kü jala, nai ni kanga ludaktsüogo aser timtemdaktsüogo, kechiaser ni KIBUBA dang langka atemzükogo, koba ni meyipa agitsü makok.”

³⁶Aser lai pa dang ashi, “Oba nai KIBUBA dang ne bang lapoker süra ne bang nungi koma adok yamaji kü dang inyakangma, kechiyong KIBUBAi ne tsükchirtem Ammon nunger dak na asoshi mang yangtsüogo.”

³⁷Aser lai tebu dang ashi, “Ni asoshi ya dang inyakdakjangma, oda ita ana kü kija tokjang angji ni tenemi oa nemzütsü aser ni kü medemertem den kü tasüngtet aiwa mang ayimtsü.”

³⁸Idangji pai langzü, “Oang.” Aser pai la ita ana asoshi pila-a yok. Aser la aser lar medemertem tenemi oa la tasüngtet aiwa mang ayim.

³⁹Ita anaji süir külen lai tebu dangi shilang, aser pai atemzükba ama la dang inyak, aser la tasüngtet aiür ka ama asü. Aser Israel nung ibai yimsü ka aküm,

⁴⁰oda küm shia Israeltsürtemi Gilead nunger Yeftha jala asoshi mangyimba bilemteta anogo pezünü tenemleni oa liasü.