Read njo OBENDANGERTEM 12 Bible Online

OBENDANGERTEM 12 - njo bible

OBENDANGERTEM 12

¹Idangji Efraim nungertem külemi sentep aser Zafon ajanga or Yeftha dang ashi, “Kechiba Ammon nunger den raratsü nai ayong ajanga or onokbo ne den aotsü maja? Onoki ne kolak manung ner ki rongtoktsütsü.”

²Aser Yefthai parnok dang ashi, “Ni aser kü nübur Ammon nunger den kanga anema liasü; aser ni nenok ajadang nenoki parnok ket nungi onok mekümzük.

³Aser kodang nenoki ni mekümzüktsü ta ni ajitet, ni kü taküm kü ket nung amer Ammon nunger anema ajanga ao, aser KIBUBAi parnok kü ket nung agütsü; ajangla kechiba tanü nenok kü den raratsü atu?”

⁴Idangji Yefthai pei nübur ajak aniten aser Efraim den rara; aser Gilead nisungtemi Efraim amak, kechiaser parnoki ashi, “Nenok Efraim nungi ajenertem, nenok Gilead nunger, Efraim aser Manase rongnung alirtem.”

⁵Aser Efraim nunger anema Gilead nungeri Yordan tzütendak agi. Aser kodang Efraim nungi ajener kari, ni süia odakjang, ta shidir, Gilead nungeri pa dang ashi, “Na Efraim nunger asü?” Kodang pai nunga ta shidir,

⁶parnoki pa dang ashi, Ajangla Shibboleth ta shiang, aser pai ashi Sibboleth; kechiyong pai ola shitak madoktet; idangji parnoki pa pua aruli aser Yordan tzütendak tepsetli asü. Aser iba mapang nung Efraim nunger meyi lir-ana tepset.

⁷Yefthai küm trok Israel o bendang. Ajiser Gilead nungba Yeftha asü, aser Gilead nung pei yimti nung arem.

⁸Pa sülen Bethlehem nunger Ibzani-i Israel o bendang.

⁹Pa jabaso semer liasü; aser jala semer pai rabir den kibong kümdaktsü, aser par jabaso asoshi bendanglen nungi jala semer aniok. Aser pai küm tenet Israel o bendang.

¹⁰Ajiser Ibzan asü, aser Bethlehem nung pa arem.

¹¹Pa sülen Zebulun nunger Eloni Israel o bendang; aser pai küm ter Israel o bendang.

¹²Ajiser Zebulun nunger Elon asü, aser Zebulun lima Aijalon nung arem.

¹³Pa sülen Pirathon nunger Hillel jabaso Abdoni Israel o bendang.

¹⁴Pa jabaso lir aser semchir tebur semer liasü, aser parnoki gado neter nung asang; aser pai küm ti Israel o bendang.

¹⁵Aser Pirathon nunger Hillel jabaso Abdon asü, aser Amalek nunger tenem lima Efraim linük nung Pirathon nung arem.