Read njo OBENDANGERTEM 13 Bible Online

OBENDANGERTEM 13 - njo bible

OBENDANGERTEM 13

¹Tanaben Israel nungeri kechi KIBUBA nükdang majung aji inyak; aser KIBUBAi parnok Filistia nunger ket nung küm lir agütsü.

²Dan kidong nungi Zora nunger ka tenüng agi Manoa liasü; aser tebutsü tapung liasü, tanur maso.

³Aser KIBUBA tenyarji tetsürla dangi adok, aser ashi, “Ajiang, na tapung aser tanur masor; saka na mashisa alitsü aser jabaso ka asotsü.”

⁴Aji asü nung kümdangang, yi mesüra mejemtzü tejem, aser memerükba kecha techi.

⁵ Kechiyong angang, na mashisa alitsü aser jabaso ka asotsü. Pa kolak nung kusünok mataloktsü, kechiaser tasodang nungi tanurji Tsüngrem dang Nazirit[3] ka alitsü; aser Filistia nunger ket nungi pai Israel kümzüktsü tenzüktsü.

⁶Idangji tetsür jagi arua pei kinungpu dang ashi, “Tsüngrem nisung ka kü dangi aru, aser pa tejak Tsüngrem tenyar mesüka, kanga tetsübutsü liasü; pa kolen nungiar ni pa dang masüngdang aser pai kü dang pa tenüng mashi;

⁷saka pai kü dang ashi, ajiang na mashisa akümtsü, aser jabaso ka asotsü; anungji yi mesüra mejemtzü tejem; aser memerükba kecha techi, kechiyong tanurji tasonü nungi pa tasünü tashi Tsüngrem dang Nazarit ka alitsü.”

⁸Idangji Manoai KIBUBA dang mepishi, aser ashi, “Oh KIBUBA ni ne dang sarasademer, nai yokba Tsüngrem nisungbaji onok dangi yokangma, aser tasotsü aliba tanur denji onoki kechi inyaktsüar onok dang sayuangma.”

⁹Tsüngremi Manoa ola anga aser KIBUBA tenyarji tetsürla dangi la moapu nung mena alidang aru saka kinungpu Manoa la den mali asü.

¹⁰Aser tetsürlaji ilunga asüm aser la kinungpu dang ashi, “Ajiang, kenü kü dangi adokba nisung to kü dangi adoka lir.”

¹¹Manoa arameso aser tebutsü sülen ao, aser nisung dang jagi arua pa dang ashi, “Iba tetsür dang jembiba nisungji na asü?” Aser pai ashi, “Nia”

¹²Manoai ashi, “Kodang ne o atalokdir, tanurba taküm yimya kechi asütsü, aser pai kechi inyaktsü?”

¹³KIBUBA tenyari Manoa dang ashi, “Ni tetsürla dang ashiba ajak lai kümdanga liang.

¹⁴Tsükmenatzü nungi adokba kecha lai machitsü, mesüra la nem yi mesüra mejemtzü tejemdaktsü, mesüra memerükba oset kecha machitsü; ni la dang melaba ajak la nem benshidakjang.”

¹⁵Manoai KIBUBA tenyar dang ashi, “Yimlibilema onoki na sotnür, aser na asoshi nabong chanu ka renemtsüdi.

¹⁶Aser KIBUBA tenyari Manoa dang ashi, nai ni sotaka, ni ne chiyungtsü machitsü; saka nai tarongba tenla ka renemra, idangji KIBUBA nem agüjang.”

¹⁷Manoai KIBUBA tenyar dang ashi, “Ne o atalokdang onoki ne dang akhümtsübu sayutsü asoshi, ne nüng kechi?”

¹⁸KIBUBA tenyari pa dang ashi, “Ya tesüngmangtsü ta meteta kechiba nai kü nüng asüngdanger?”

¹⁹Anungji Manoai nabong chanuji chiyungtsü tenla den agi, aser KIBUBA, shibai tesüngmangtsü inyaker, pa nem aji lung manung tenla.

²⁰Kodang tenladak nungi milakji anüngleni atu, KIBUBA tenyarji Manoa aser tebutsü nati repranga alidang milak nung atu; aser parnok tejak ali nung rembang.

²¹Saka KIBUBA tenyarji joko Manoa aser tebutsü dangi madok. Idangjiang Manoai pa KIBUBA tenyar ta metet.

²²Manoai tebutsü dang ashi, “Atangji asenbo asütsü, kechiaser asenoki Tsüngrem nguogo.”

²³Saka tebutsüi pa dang ashi, “KIBUBAi asenok tepsettsü ka asü nungbo, pai tarongba tenla aser chiyungtsü tenla asen nungi magizükla, mesüra ya ajaki asenok dang mesayula, mesüra iba amai asenok nem tang memetetdaktsüla.”

²⁴Aser tetsür jagi jabaso ka aso, aser pa tenüng Samson aja; aser tanurji ain, aser KIBUBAi pa moatsü.

²⁵Aser Zora aser Eshtaol tsüngda nung Mahaneh-dan nung pa dak KIBUBA tanelai ajongshitsü tenzük.